سابق وزیراعظم اور بانی پاکستان تحریک انصاف عمران خان کے صاحبزادے قاسم خان نے پاکستانی عوام اور پی ٹی آئی کے کارکنوں سے اپیل کی ہے کہ وہ اڈیالہ جیل کے قریب کسی مارچ یا احتجاج کی کوشش نہ کریں۔ قاسم خان نے یہ اپیل ایسے وقت میں کی ہے جب پی ٹی آئی نے عمران خان کی رہائی سمیت دیگر مطالبات کے حق میں 27 ستمبر کو اسلام آباد کی جانب لانگ مارچ کا اعلان کر رکھا ہے۔
قاسم خان نے سوشل میڈیا پلیٹ فارم ایکس پر جاری اپنے پیغام میں کہا کہ انہیں اپنے ذرائع سے اطلاعات ملی ہیں کہ اڈیالہ جیل کے قریب کسی اجتماع کو کسی جوابی کارروائی کے لیے جواز کے طور پر استعمال کیا جاسکتا ہے۔ انہوں نے خدشہ ظاہر کیا کہ ایسی کسی بھی صورت حال میں ان کے والد عمران خان کی زندگی کو شدید خطرہ لاحق ہوسکتا ہے۔
انہوں نے عوام سے اپیل کرتے ہوئے کہا کہ احتیاط اور تحمل کا مظاہرہ کیا جائے اور کسی کو بھی ایسا کوئی جواز یا موقع فراہم نہ کیا جائے جس کے نتیجے میں کوئی ایسا واقعہ پیش آئے جو ان کے والد کی جان کے لیے خطرہ بن جائے۔ قاسم خان کا کہنا ہے کہ ان کی اپیل کا مقصد کسی بھی ایسے ممکنہ تصادم یا صورتحال سے بچنا ہے جس سے اڈیالہ جیل میں قید عمران خان کی سلامتی متاثر ہوسکتی ہے۔
قاسم خان کی یہ اپیل ایک ایسے وقت میں سامنے آئی ہے جب 27 ستمبر کے مجوزہ لانگ مارچ کے پیش نظر وفاقی دارالحکومت اور پنجاب کے مختلف علاقوں میں سکیورٹی انتظامات سخت کیے گئے ہیں۔ حکومت کی جانب سے اسلام آباد اور پنجاب کے بعض علاقوں میں رینجرز کی تعیناتی کی گئی ہے جبکہ اسلام آباد میں دفعہ 144 بھی نافذ ہے۔
پی ٹی آئی نے 27 ستمبر کے احتجاج کا اعلان عمران خان کی رہائی اور دیگر مطالبات کے حق میں کیا ہے۔ دوسری جانب انتظامیہ نے امن و امان برقرار رکھنے کے لیے مختلف اقدامات کیے ہیں اور شہریوں کو غیر قانونی اجتماعات اور سرگرمیوں سے گریز کی ہدایت کی گئی ہے۔
مارچ سے قبل عمران خان کی تینوں بہنوں سمیت پی ٹی آئی کے بعض رہنماؤں اور کارکنوں کی گرفتاریوں کی اطلاعات بھی سامنے آئی ہیں۔ حکام کی جانب سے ان اقدامات کو امن و امان برقرار رکھنے کے لیے قانونی اختیارات کے استعمال سے جوڑا گیا ہے۔
27 ستمبر کے احتجاج سے قبل پیدا ہونے والی صورتحال میں ایک طرف انتظامیہ کی جانب سے سکیورٹی انتظامات سخت کیے جارہے ہیں جبکہ دوسری جانب عمران خان کے صاحبزادے نے خود حامیوں سے اڈیالہ جیل کا رخ نہ کرنے، احتیاط اور تحمل کا مظاہرہ کرنے کی اپیل کی ہے۔
