میں بل گیٹس کی بیٹی ہوں ، نازش جہانگیر کا سوشل میڈیا کی مبالغہ آرائی پر طنزیہ ردعمل

موجودہ  ڈیجیٹل دور میں سوشل میڈیا زندگی کا ایک ایسا لازمی حصہ بن چکا ہے جہاں شہرت حاصل کرنے اور ‘لائکس’ اور ‘ویوز’ کی دوڑ میں ہر کوئی اندھی تقلید میں لگا ہوا ہے اور اس دوڑ میں اکثر سچائی پیچھے رہ جاتی ہے اور مبالغہ آرائی، جھوٹی کہانیاں اور بناوٹ پر سب یقین کرنے لگتے ہیں ۔

 حال ہی میں پاکستانی شوبز انڈسٹری کی مقبول اداکارہ نازش جہانگیر نے اسی کھوکھلے پن اور سوشل میڈیا کی جھوٹی دنیا پر بھرپور طنز کرتے ہوئے ایک ایسا بیان دیا ہے جس نے سوشل میڈیا صارفین کی توجہ اپنی جانب مبذول کروا لی ہے۔

 اداکارہ نازش جہانگیر نے فوٹو اینڈ ویڈیو شیئرنگ پلیٹ فارم انسٹاگرام پر اداکارہ نے مبالغہ آمیز خبروں پر طنزیہ ردِعمل دیتے ہوئے انسٹا اسٹوری شیئر کی ہے۔

نازش جہانگیر نے انسٹا اسٹوری میں اپنے الفاظ کو سیاق و سباق سے ہٹ کر پیش کیے جانے اور توجہ حاصل کرنے والی سرخیوں کے لیے انہیں نئے انداز میں پیش کرنے پر برہمی کا اظہار کیا ہے۔

اداکارہ نے طنزیہ انداز میں لکھا ہے کہ میں بل گیٹس کی بیٹی ہوں، یہ نہیں بتایا میں نے۔

اس کے بعد انہوں نے اپنی ناراضی کی وجہ بیان کرتے ہوئے لکھا ہے کہ یہی وجہ ہے کہ مجھے اس ملک میں انٹرویوز دینا بالکل پسند نہیں، لوگ ایک سادہ سی بات کو کس طرح توڑ مروڑ دیتے ہیں، اسے مکمل طور پر سیاق و سباق سے ہٹا کر ایسا پیش کرتے ہیں جس کا مقصد ہی کچھ اور تھا۔

اداکارہ نے لکھا ہے کہ اپنی کہانی خود گھڑنے سے پہلے مکمل بات جانیں، ہر چیز کو صرف سرخی بنانے کے لیے سنسنی خیز بنانے کی ضرورت نہیں ہوتی۔

واضح رہے کہ نازش جہانگیر کا یہ ردِعمل ان کے حالیہ انٹرویو کے بعد سامنے آیا ہے، جس میں انہوں نے رشتوں اور اپنے ممکنہ شریکِ حیات سے متعلق ترجیحات پر گفتگو کی تھی اور ان  کے بیانات کے مختصر حصے سوشل میڈیا اور شوبز پلیٹ فارمز پر تیزی سے گردش کرنے لگے تھے۔

یہ بھی پڑھیں: بھارت میں امن کی بگڑتی صورتحال سے متعلق بیان، سنجے دت کی وضاحت آگئی

انٹرویو کے دوران اداکارہ سے پوچھا گیا کہ وہ کس طرح کے شخص سے شادی کرنا چاہیں گی؟ جس پر نازش نے کھل کر جواب دیتے ہوئے کہا تھا کہ میں ایسے شخص کو ترجیح دوں گی جس کی شخصیت مجھ سے ملتی جلتی ہو، جس کے ساتھ میں ہنس سکوں، زندگی سے لطف اندوز ہو سکوں اور ایک مضبوط تعلق قائم کر سکوں۔

انٹرویو کے دوران موضوع دل ٹوٹنے کے تجربے کی جانب بھی گیا، جہاں نازش سے پوچھا گیا کہ کیا وہ ایسے شخص سے شادی کرنے پر غور کریں گی جو ماضی میں جذباتی صدمے یا دل شکنی کا سامنا کر چکا ہو؟ جس پر اداکارہ نے اسے مسئلہ سمجھنے کے بجائے مثبت انداز میں اپناتے ہوئے کہا کہ میں ایسی شخصیت بننا چاہوں گی جو اپنے مستقبل کے شریکِ حیات کو ماضی کے دکھ سے نکلنے میں مدد دے سکوں۔

ان کی جانب سے کسی کے ’ٹوٹے ہوئے دل کو ٹھیک کرنے‘ یا اسے جذباتی طور پر سنبھالنے کی خواہش کے اظہار کو بعد ازاں مختلف آن لائن پوسٹس اور خبروں میں مختلف انداز میں پیش کیا گیا جس پر اداکارہ نے ردعمل کا اظہار کیا۔

یہ بھی پڑھیں :اداکارہ نوال پرویز کا خاموشی سے نکاح، تصاویر سوشل میڈیا پر وائرل