میٹرک پاس طلبہ کیلئے صحت کے شعبے میں اپنا مستقبل بنانے کا بڑا موقع سامنے آگیا ، پنجاب میڈیکل فیکلٹی نے صوبے بھر کے سرکاری طبی تربیتی اداروں میں 17 مختلف شعبوں کے دو سالہ ڈپلومہ کورسز میں داخلوں کا اعلان کر دیا ہے، جن کیلئے سائنس مضامین کے ساتھ میٹرک پاس امیدوار درخواست دے سکتے ہیں۔
پنجاب میڈیکل فیکلٹی کے جاری کردہ داخلہ نوٹس کے مطابق تعلیمی سیشن 2026-28 کے ان کورسز میں داخلے کیلئے آن لائن درخواستیں جمع کرانے کی آخری تاریخ 20 نومبر 2026 مقرر کی گئی ہے۔ امیدواروں کو داخلے کیلئے اپنی پسند کے کورسز اور تربیتی اداروں کا انتخاب آن لائن داخلہ پورٹل کے ذریعے کرنا ہوگا۔
کون سے 17 میڈیکل ڈپلومہ کورسز دستیاب ہیں؟
پنجاب میڈیکل فیکلٹی کے تحت جن 17 شعبوں میں دو سالہ ڈپلومہ کورسز پیش کیے جا رہے ہیں، ان میں ڈسپنسر ٹیکنیشن، میڈیکل لیبارٹری ٹیکنیشن، آپریشن تھیٹر ٹیکنیشن، ریڈیوگرافی اینڈ امیجنگ ٹیکنیشن اور پبلک ہیلتھ ٹیکنیشن شامل ہیں۔
اس کے علاوہ ڈینٹل ٹیکنیشن، ڈینٹل ہائیجینسٹ، ڈینٹل سرجری اسسٹنٹ، ڈائیلاسز ٹیکنیشن، آپتھلمک ٹیکنیشن، فزیوتھراپی ٹیکنیشن، اینستھیزیا ٹیکنیشن، سینٹرل اسٹرلائزیشن ٹیکنیشن، فارمیسی اسسٹنٹ، ڈسپنسنگ آپٹیشنری، کارڈیک ٹیکنیشن اور اینڈوسکوپی ٹیکنیشن کے کورسز بھی شامل ہیں۔
داخلے کیلئے تعلیمی قابلیت کیا ہونی چاہیے؟
داخلے کے خواہش مند امیدواروں کیلئے سائنس مضامین کے ساتھ میٹرک پاس ہونا ضروری ہے۔ امیدوار نے فزکس، کیمسٹری اور بائیولوجی کے مضامین پڑھے ہوں اور کم از کم سیکنڈ ڈویژن حاصل کی ہو۔
اس کے علاوہ ان تینوں سائنس مضامین میں مجموعی طور پر کم از کم 45 فیصد نمبر حاصل کرنا بھی لازمی قرار دیا گیا ہے۔
داخلہ پالیسی کے مطابق امیدواروں کیلئے عمر کی کوئی بالائی حد مقرر نہیں کی گئی، یعنی تعلیمی شرائط پوری کرنے والے امیدوار عمر کی پابندی کے بغیر درخواست دے سکتے ہیں۔
معذور اور حافظِ قرآن امیدواروں کیلئے اضافی نمبر
داخلہ پالیسی میں معذور امیدواروں کیلئے 2 فیصد کوٹہ مختص کیا گیا ہے، جبکہ متعلقہ میڈیکل بورڈ کی منظوری سے اہل معذور امیدواروں کو میرٹ میں 20 اضافی نمبر دیے جا سکتے ہیں۔
اسی طرح حفظِ قرآن مکمل کرنے والے امیدواروں کیلئے 10 اضافی میرٹ نمبر مقرر کیے گئے ہیں، تاہم اس کیلئے تسلیم شدہ ادارے کا سرٹیفکیٹ جمع کرانا ضروری ہوگا۔
درخواست فیس اور ضروری دستاویزات
ان ڈپلومہ کورسز میں داخلے کیلئے درخواست فیس 500 روپے مقرر کی گئی ہے، جو ناقابلِ واپسی ہوگی۔ امیدوار پنجاب میڈیکل فیکلٹی کے آن لائن پورٹل سے فیس چالان حاصل کرکے اس پر درج ہدایات کے مطابق ادائیگی کر سکیں گے۔
درخواست کے ساتھ میٹرک کی سند یا رزلٹ کارڈ، ڈومیسائل سرٹیفکیٹ، قومی شناختی کارڈ یا ب فارم اور حالیہ پاسپورٹ سائز تصویر فراہم کرنا ہوگی۔ متعلقہ کوٹے یا اضافی نمبروں کے خواہش مند امیدواروں کو مطلوبہ سرٹیفکیٹس بھی جمع کرانے ہوں گے۔
امیدوار داخلہ فارم میں کورسز اور تربیتی اداروں کی زیادہ سے زیادہ پانچ ترجیحات منتخب کر سکتے ہیں۔ تاہم کسی ایک ترجیح پر داخلہ ملنے کی صورت میں باقی تمام ترجیحات غیر فعال ہو جائیں گی۔
درخواست دینے کی آخری تاریخ
میڈیکل کے ان 17 ڈپلومہ کورسز میں داخلے کے خواہش مند امیدوار 20 نومبر 2026 تک پنجاب میڈیکل فیکلٹی کے سرکاری داخلہ پورٹل کے ذریعے آن لائن درخواست جمع کرا سکتے ہیں۔
مزید تفصیلات، داخلہ پالیسی اور درخواست دینے کیلئے پنجاب میڈیکل فیکلٹی کی سرکاری ویب سائٹ ملاحظہ کریں :https://pmfpunjab.edu.pk/
By 
