پاکستان کی بیٹی کا عالمی میدان میں ڈنکا،دوعالمی چیمپئنز کو پچھاڑ کر تاریخ رقم کردی

پاکستانی کھیلوں کے لیے عالمی سطح سے بڑی خوشخبری سامنے آگئی ہے جہاں پاکستانی فائٹر ملیحہ علی نے انٹرنیشنل مکسڈ مارشل آرٹس فیڈریشن (آئی ایم ایم اے ایف) ورلڈ چیمپئن شپ کے فائنل میں جگہ بنا کر نئی تاریخ رقم کردی۔

تبلیسی میں جاری عالمی مقابلوں میں ملیحہ علی نے سیمی فائنل میں میکسیکو کی پین امریکن چیمپئن اینڈریا گیبریلا گزمین کو شکست دے کر فائنل تک رسائی حاصل کی۔ اس کامیابی کے ساتھ وہ آئی ایم ایم اے ایف ورلڈ چیمپئن شپ کے فائنل میں پہنچنے والی پہلی پاکستانی خاتون فائٹر بن گئی ہیں۔

دو عالمی چیمپئنز کو شکست

ملیحہ علی کا فائنل تک کا سفر غیرمعمولی کامیابیوں سے عبارت ہے۔ پاکستانی فائٹر نے سیمی فائنل میں میکسیکو کی مضبوط حریف کو زیر کرنے سے پہلے روس کی نامور یورپی چیمپئن کو بھی شکست دی تھی۔

 یہ بھی پڑھیں :بھارت کیخلاف ٹی 20 سیریز، نیوزی لینڈ کے آل راؤنڈر گلین فلپس نے نئی تاریخ رقم کردی

مسلسل دو مضبوط بین الاقوامی حریفوں کے خلاف کامیابی نے انہیں عالمی مقابلے کے فائنل تک پہنچا دیا ہے۔ ان فتوحات نے پاکستانی خواتین فائٹرز کے لیے بین الاقوامی سطح پر ایک نئی مثال قائم کردی ہے۔

پاکستانی خواتین کے لیے نئی تاریخ

ملیحہ علی کی کامیابی محض ایک مقابلے میں فتح نہیں بلکہ پاکستانی خواتین کے مکسڈ مارشل آرٹس میں عالمی سطح پر آگے بڑھنے کی اہم پیش رفت ہے۔

آئی ایم ایم اے ایف ورلڈ چیمپئن شپ جیسے بڑے مقابلے کے فائنل تک پہنچنا اس بات کی علامت ہے کہ پاکستانی فائٹرز بھی بین الاقوامی سطح کے سخت مقابلوں میں اپنی صلاحیتوں کا لوہا منوا سکتی ہیں۔

 یہ بھی پڑھیں :ون ڈے کرکٹ کی تاریخ کا نیا باب رقم ، ویرات کوہلی نے ناقابل تسخیر ریکارڈ قائم کر دیا

اب تمام نظریں فائنل پر مرکوز ہیں جہاں ملیحہ علی کے پاس عالمی اعزاز اپنے نام کرنے اور پاکستان کے لیے ایک اور تاریخی کامیابی حاصل کرنے کا موقع ہوگا۔