پہلے جعلی افسر اور اب ‘پراپرٹی ایڈوائزر’: ضیاء الرحمان کا 2025 میں نیا کاروبار، حیات آباد پشاور کے بینک کھاتے اور میانوالی کی نئی زمین

جمعیت علمائے اسلام (ف) کے سربراہ مولانا فضل الرحمان کے بھائی ضیاء الرحمان کے مالی معاملات سے متعلق فراہم کردہ 2025 کے ایف بی آر گوشوارے کی تفصیلات میں ان کے نئے کاروبار، آمدن، بینک بیلنس اور زرعی اراضی سے متعلق اہم معلومات سامنے آئی ہیں۔

 اعدادوشمار کے مطابق ضیاء الرحمان نے 2025 میں اپنی سرکاری تنخواہ صفر ظاہر کی، جبکہ خود کو پانچ لاکھ روپے کے سرمائے کے ساتھ پراپرٹی ایڈوائزر (Property Advisor) کے طور پر ظاہر کیا اور اس کاروبار سے 16 لاکھ 50 ہزار روپے آمدن درج کی۔

ذرائع  کے مطابق ضیاء الرحمان نے پراپرٹی ایڈوائزری کے کاروبار کے لیے پانچ لاکھ روپے سرمایہ ظاہر کیا ہے۔ اس کے مقابلے میں کاروباری آمدن 16 لاکھ 50 ہزار روپے درج ہے  جو ظاہر کردہ ابتدائی سرمائے سے تین گنا سے بھی زیادہ ہے۔

یہ بھی پڑھیں: مولانا فضل الرحمان کے اثر و رسوخ کا کمال، پی ٹی سی ایل انجینئر سے ڈی سی کراچی بننے تک بھائی ضیاء الرحمن کا حیرت انگیز سفر،سوشل میڈیا صارفین نے بھانڈا پھوڑ دیا

مالی گوشوارے میں کاروباری آمدن کے علاوہ 73 ہزار روپے ڈیویڈنڈ اور 3 لاکھ 84 ہزار روپے مالیت کے بونس شیئرز بھی ظاہر کیے گئے ہیں۔ اس طرح ضیاء الرحمان کی مالی تفصیلات میں پراپرٹی کے کاروبار کے ساتھ حصص سے متعلق اثاثے اور آمدن بھی شامل ہیں۔

ضیاء الرحمان کے مالی معاملات کا ایک اور اہم پہلو پشاور کے علاقے حیات آباد میں واقع مسلم کمرشل بینک (MCB) کے اکاؤنٹ میں ظاہر کردہ رقم ہے۔ فراہم کردہ 2025 کے گوشوارے کی تفصیلات کے مطابق حیات آباد برانچ کے بینک اکاؤنٹ میں 38 لاکھ 33 ہزار روپے موجود ظاہر کیے گئے ہیں۔ یہ رقم ان کی ظاہر کردہ سالانہ کاروباری آمدن سے نمایاں طور پر زیادہ ہے۔

گوشوارے کی تفصیلات میں جائیداد سے متعلق بھی ایک نئی پیش رفت سامنے آئی ہے۔ ذرائع  کے مطابق ضیاء الرحمان نے 22 مارچ 2025 کو پنجاب کے ضلع میانوالی کی تحصیل عیسیٰ خیل کے موضع کھگلانوالہ میں تین کنال پانچ مرلہ زرعی اراضی حاصل کی۔ تاہم اس زمین کی خریداری کی قیمت، ادائیگی کے ذرائع اور انتقال یا رجسٹری کی مکمل تفصیلات فراہم کردہ مواد میں شامل نہیں ہیں۔

یہ بھی پڑھیں: حلوہ بھی خود، وزارتیں بھی اپنی پسند کی، اب کرپشن کا حساب کون دے گا؟ فیصل کریم کنڈی نے فضل الرحمن کو آڑھے ہاتھوں لے لیا

مذکورہ اعداد و شمار میں اہم سوال یہ ہے کہ ضیاء الرحمان نے پراپرٹی ایڈوائزری کا کاروبار کب اور کس نوعیت میں شروع کیا، پانچ لاکھ روپے کے ظاہر کردہ سرمائے کے مقابلے میں 16 لاکھ 50 ہزار روپے کاروباری آمدن کی تفصیلات کیا ہیں اور حیات آباد کے بینک اکاؤنٹ میں موجود 38 لاکھ 33 ہزار روپے کے مجموعی بیلنس کی تشکیل کن ذرائع سے ہوئی؟

اسی طرح میانوالی میں 22 مارچ 2025 کو حاصل کی گئی زرعی اراضی کی قیمت، ادائیگی کا طریقہ اور متعلقہ مالی ریکارڈ بھی اس معاملے کی مکمل تصویر واضح کرنے کے لیے اہم ہیں۔

ضیاء الرحمان کے 2025 کے فراہم کردہ مالی اعدادوشمار میں سرکاری تنخواہ صفر ہونے، پراپرٹی کے کاروبار سے آمدن ظاہر کرنے، حصص سے متعلق مالی تفصیلات، بینک بیلنس اور نئی زرعی اراضی کے حصول کی نشاندہی ہوتی ہے۔