فضل الرحمان خاندان کے تینوں گوشواروں کا تقابلی پوسٹ مارٹم: باپ کا سونا اسلحہ بن گیا، بیٹے کا سونا 2 ہزار روپے تولہ اور بھائی کا 15تولہ سونا صفر روپے

جمعیت علمائے اسلام (ف) کے سربراہ مولانا فضل الرحمان، ان کے صاحبزادے اسد محمود اور بھائی ضیاء الرحمان کے مالی گوشواروں کی فراہم کردہ تفصیلات میں سونے، اسلحے، زرعی اراضی اور دیگر اثاثوں کی ظاہر کردہ مالیت سے متعلق اہم سوالات سامنے آئے ہیں۔ 

تینوں افراد کے مالی ریکارڈ کے تقابلی جائزے میں ایک طرف فضل الرحمان کے 55 تولہ سونے کا اندراج 2024 میں اسلحے کی مد میں ہونے کا دعویٰ کیا گیا ہے، دوسری جانب اسد محمود کے تین تولہ سونے کی مجموعی قیمت محض 6 ہزار 737 روپے، جبکہ ضیاء الرحمان کی اہلیہ کے 15 تولہ سونے کی مالیت صفر روپے ظاہر کیے جانے کی تفصیلات سامنے آئی ہیں۔

مالی ریکارڈ  کے مطابق مولانا فضل الرحمان نے 55 تولہ سونے کی مالیت 9 لاکھ 50 ہزار روپے ظاہر کی تھی، تاہم 2024 کے گوشوارے میں یہی اثاثہ اسلحے (Arms) کی مد میں درج ہونے کا دعویٰ سامنے آیا ہے۔ اس اندراج سے بنیادی سوال پیدا ہوتا ہے کہ سونے کے طور پر ظاہر کیا گیا اثاثہ اسلحے کی کیٹیگری میں کیسے منتقل ہوا؟

 فضل الرحمان کے صاحبزادے اسعد محمود کے مالی گوشوارے میں بھی سونے کی ظاہر کردہ قیمت توجہ طلب ہے۔   اعدادوشمار کے مطابق انہوں نے تین تولہ سونے کی مجموعی مالیت صرف 6 ہزار 737 روپے ظاہر کی، جس کے مطابق ایک تولہ سونے کی اوسط درج شدہ قیمت تقریباً 2 ہزار 246 روپے بنتی ہے۔

یہ بھی پڑھیں: حلال و حرام کا درس دینے والے فضل الرحمن کی بے نامی جائیدادوں کے منظر عام پر آنے کا سلسلہ جاری ، کراچی میں رحیم پلازہ سامنے آگیا

یہ اندراج اس اعتبار سے سوالات پیدا کرتا ہے کہ تین تولہ سونے کی اتنی کم مالیت کس بنیاد پر ظاہر کی گئی؟ کیا یہ سونے کی اصل خریداری کے وقت ادا کی گئی قیمت ہے، کسی سابقہ سال سے منتقل ہونے والی تاریخی مالیت ہے یا اس کی کوئی دوسری مالی وضاحت موجود ہے؟

خاندان کے تیسرے فرد ضیاء الرحمان کے مالی گوشوارے کی فراہم کردہ تفصیلات میں اثاثوں کی مالیت سے متعلق مزید سوالات سامنے آتے ہیں۔ ان کی اہلیہ کے 15 تولہ سونے کی مالیت صفر روپے ظاہر کی گئی ہے، جبکہ جہیز کے سامان کی قیمت بھی صفر روپے درج ہونے کی نشاندہی کی گئی ہے۔

اس معاملے میں اہم سوال یہ ہے کہ آیا سونے اور جہیز کے سامان کے لیے صفر روپے کا اندراج کسی مخصوص ٹیکس یا اثاثہ جاتی رپورٹنگ کے طریقہ کار کے تحت کیا گیا  یا یہ اثاثوں کی مالیت درج نہ کیے جانے کا معاملہ ہے؟

ضیاء الرحمان کے ظاہر کردہ اثاثوں میں زرعی اراضی اور رہائشی پلاٹ سے متعلق اعدادوشمار بھی قابلِ توجہ ہیں۔  ریکارڈ کے مطابق ڈیرہ اسماعیل خان میں واقع 375 کنال وراثتی زرعی اراضی کی مالیت صفر روپے درج کی گئی ہے، جبکہ پہاڑ پور میں 17 مرلہ پلاٹ کی مجموعی قیمت صرف 68 ہزار 800 روپے ظاہر کی گئی۔

یہ بھی پڑھیں: ضیا الرحمن جواب دو۔۔۔!! کاغذوں میں پورے گھر کا خرچ 40 ہزار روپے ماہانہ، مگر لندن کے مے فیئر اور بارسلونا کے فائیو اسٹار ہوٹلوں میں کروڑوں کے بل کس نے دیے؟

پہاڑ پور کے پلاٹ کی ظاہر کردہ مجموعی مالیت کے مطابق فی مرلہ قیمت تقریباً 4 ہزار 47 روپے بنتی ہے۔ دوسری جانب 375 کنال وراثتی زمین کی مالیت صفر ظاہر کیے جانے سے یہ سوال پیدا ہوتا ہے کہ اس زمین کے حصول، وراثت میں منتقلی اور مالی گوشوارے میں اس کی قدر کے تعین کے لیے کون سا طریقہ اختیار کیا گیا؟

مولانا فضل الرحمان، اسد محمود اور ضیاء الرحمان کے فراہم کردہ مالی اعدادوشمار کو ایک ساتھ دیکھا جائے تو سونے، اسلحے اور غیر منقولہ جائیداد کے اندراجات میں مختلف نوعیت کے سوالات سامنے آتے ہیں۔ ایک گوشوارے میں 55 تولہ سونے کے اسلحے کی مد میں ظاہر ہونے کا دعویٰ ہے، دوسرے میں تین تولہ سونے کی مجموعی مالیت چند ہزار روپے درج ہے، جبکہ تیسرے میں 15 تولہ سونے اور سینکڑوں کنال وراثتی اراضی کی مالیت صفر ظاہر ہونے کی تفصیلات موجود ہیں۔

تینوں افراد کے مالی گوشواروں سے متعلق ان تفصیلات کے بعد بنیادی سوال یہ ہے کہ آیا تمام اثاثے متعلقہ قوانین اور رپورٹنگ کے تقاضوں کے مطابق ظاہر کیے گئے، اور کیا سونے، اسلحے، زمین اور دیگر جائیدادوں کی درج شدہ مالیت کی مکمل دستاویزی وضاحت موجود ہے؟