احتجاج سے پہلے ہی جے یو آئی کے کارکنوں میں پھوٹ اور مایوسی، قیادت کے کھربوں کے اثاثے سامنے آنے کے بعد مدارس کے طلبہ نے ایندھن بننے سے انکار کر دیا

جمعیت علمائے اسلام (ف) کی جانب سے اتوار، 15 نومبر کو خیبر پختونخوا میں احتجاج کی کال دی گئی ہے، تاہم احتجاج سے قبل ہی پارٹی کارکنوں میں  اختلافات اور مایوسی کی اطلاعات سامنے آ رہی ہیں۔

 پارٹی قیادت کے کھربوں روپے کے اثاثوں سے متعلق غیر مصدقہ دعووں کے بعد مدارس کے طلبہ کی جانب سے بھی احتجاج میں شرکت سے انکار کی اطلاعات ہیں، جس سے احتجاجی کال پر کارکنوں کے ممکنہ ردعمل اور پارٹی کی اندرونی صورتِ حال کے حوالے سے سوالات اٹھ رہے ہیں۔

جمعیت علمائے اسلام (ف) کے کل بروز اتوار، 15 نومبر 2026 کو خیبر پختونخوا بھر میں ہونے والے احتجاجی مظاہروں سے قبل پارٹی سربراہ مولانا فضل الرحمان، ان کے صاحبزادے اسد محمود اور بھائی ضیاء الرحمان کے مالی گوشواروں اور ظاہر کردہ اثاثوں سے متعلق سوالات نے قیادت کی مالی شفافیت کے معاملے کو ایک مرتبہ پھر توجہ کا مرکز بنا دیا ہے۔

 ایک طرف پارٹی قیادت کارکنوں کو احتجاج کے لیے  منت سماجت کرکے احتجاج کو کامیاب بنانے کی کوشش کررہی ہے ، دوسری جانب قیادت کی جائیدادوں، بینک بیلنس اور غیر ملکی دوروں کے اخراجات سے متعلق سوالات  نے قیادت کی پریشانی میں مزید اضافہ کردیا ہے۔

یہ بھی پڑھیں: حلال و حرام کا درس دینے والے فضل الرحمن کی بے نامی جائیدادوں کے منظر عام پر آنے کا سلسلہ جاری ، کراچی میں رحیم پلازہ سامنے آگیا

جے یو آئی کی خیبر پختونخوا قیادت نے 15 نومبر کو صوبے کے مختلف اضلاع میں احتجاجی مظاہروں کا اعلان کر رکھا ہے۔ پارٹی کے صوبائی امیر سینیٹر مولانا عطاء الرحمان کے مطابق یہ احتجاج تجاوزات کے خلاف کارروائیوں، پارٹی قیادت کے خلاف   مہم اور صوبے کے معدنی وسائل سے متعلق معاملات پر کیا جا رہا ہے۔

احتجاجی سرگرمیوں کے دوران مولانا فضل الرحمان اور ان کے خاندان کے مالی معاملات سے متعلق فراہم کردہ تفصیلات بھی اہمیت اختیار کر گئی ہیں۔

 مولانا فضل الرحمان کے گوشواروں میں جائیدادوں اور سونے کے اندراجات سے متعلق سوالات موجود ہیں، جبکہ اسد محمود کے تین تولہ سونے کی مجموعی مالیت صرف 6 ہزار 737 روپے ظاہر کیے جانے کا دعویٰ کیا گیا ہے۔

اسی طرح ضیاء الرحمان کے مالی گوشواروں سے متعلق فراہم کردہ اعدادوشمار میں ان کی اہلیہ کے 15 تولہ سونے اور 375 کنال وراثتی زرعی اراضی کی مالیت صفر روپے درج ہونے کی نشاندہی کی گئی ہے۔ ان کے 2025 کے ریکارڈ میں پراپرٹی ایڈوائزری کے کاروبار، بینک میں 38 لاکھ 33 ہزار روپے اور میانوالی میں نئی زرعی زمین سے متعلق معلومات بھی سامنے آئی ہیں۔

یہ بھی پڑھیں: ضیا الرحمن جواب دو۔۔۔!! کاغذوں میں پورے گھر کا خرچ 40 ہزار روپے ماہانہ، مگر لندن کے مے فیئر اور بارسلونا کے فائیو اسٹار ہوٹلوں میں کروڑوں کے بل کس نے دیے؟

ضیاء الرحمان کے غیر ملکی دورے کے حوالے سے بھی سوالات اٹھائے گئے ہیں۔ فراہم کردہ دعوے کے مطابق لندن کے علاقے مے فیئر اور اسپین کے شہر بارسلونا میں قیام اور دیگر سرگرمیوں پر ایک کروڑ 20 لاکھ روپے خرچ ہوئے، جبکہ ان کے 2025 کے ٹیکس ریکارڈ میں سالانہ ذاتی اخراجات صرف 4 لاکھ 80 ہزار روپے ظاہر کیے جانے کی تفصیلات دی گئی ہیں۔

ان مالی معاملات کے تناظر میں یہ سوال اہم ہے کہ سیاسی احتجاج کے لیے کارکنوں کو متحرک کرنے والی قیادت اپنے مالی وسائل، ظاہر کردہ اثاثوں اور غیر ملکی دوروں کے اخراجات کے بارے میں کس حد تک وضاحت فراہم کرتی ہے۔