راولپنڈی ٹیسٹ: پاکستان کی پہلی اننگز کا اختتام، کس نے کتنا اسکور کیا

جنوبی افریقہ کے خلاف دوسرے روز کھیلے جا رہے ٹیسٹ میچ میں پاکستان نے اپنی پہلی اننگز 333 رنز پر مکمل کی، جبکہ جنوبی افریقہ کی جانب سے کیشوو مہاراج نے شاندار بولنگ کا مظاہرہ کرتے ہوئے سات کھلاڑیوں کو آؤٹ کیا۔

یہ بھی پڑھیں: پاکستان اور جنوبی افریقہ کے درمیان دوسرا ٹیسٹ میچ، پی سی بی کی جانب سے شائقین کیلئےبڑا تحفہ

پاکستان نے دوسرے روزاپنی اننگز کا آغاز 259 رنز 5 کھلاڑی آؤٹ کے اسکور سے کیا تھا، اس وقت سعود شکیل 42 اور آغا سلمان 10 رنز کے ساتھ وکٹ پر موجود تھے۔ دونوں بیٹسمینوں نے عمدہ بیٹنگ کرتے ہوئے ٹیم کا اسکور بڑھایا، سعود شکیل نے اپنی نصف سنچری مکمل کی، لیکن سلمان علی آغا 45 رنز بنا کر آؤٹ ہو گئے۔ اس کے بعد سعود شکیل 66 رنز بنا کر میدان چھوڑ گئے۔

پاکستان کی باقی ٹیم میں شاہین آفریدی، ساجد خان اور آصف آفریدی نے خاطر خواہ کارکردگی نہ دکھا سکے اور تینوں کو کیشوو مہاراج نے آؤٹ کیا۔ نعمان علی 6 رنز بنا کر ناٹ آؤٹ رہے۔

جنوبی افریقا کی جانب سے کیشوو مہاراج نے بولنگ کے دوران اپنی زبردست مہارت کا مظاہرہ کرتے ہوئے 7 وکٹیں حاصل کیں، جبکہ سائمن ہارمر نے2 اور کگیسو ربادا نے ایک وکٹ حاصل کی۔

پہلے روز پاکستان نے ٹاس جیت کر پہلے بیٹنگ کا فیصلہ کیا تھا۔ اس دن کپتان شان مسعود نے 87 رنز کی عمدہ اننگز کھیلی جبکہ عبداللہ شفیق نے 57 رنز بنائے۔ دونوں کی شراکت نے پاکستان کو ایک مضبوط آغاز فراہم کیا۔

مزید پڑھیں:راولپنڈی میں پاکستان اورجنوبی افریقہ کے ٹیسٹ میچ کے لیے ٹریفک پلان جاری

یہ ٹیسٹ دو میچوں کی سیریز کا دوسرا اور آخری میچ ہے، جس میں پاکستان کو پہلے ٹیسٹ میں لاہور میں 93 رنز سے فتح حاصل کر کے ایک صفر کی سبقت حاصل ہے۔ اس میچ میں پاکستان کی جانب سے عمدہ بیٹنگ اور بولنگ نے شائقین کو خوش کیا ہے اور امید ہے کہ ٹیم اس فارم کو جاری رکھے گی۔