عمران خان سمیت تحریک انصاف کے متعدد اہم رہنماؤں کے بیرون ملک جانے پر پابندی عائد

وفاقی حکومت نے پاکستان تحریکِ انصاف (پی ٹی آئی) کے بانی عمران خان سمیت پارٹی کے کئی اہم رہنماؤں کے بیرون ملک جانے پر پابندی عائد کر دی ہے۔ یہ فیصلہ 9 مئی کے فسادات کے تناظر میں سامنے آیا ہے، جس کے بعد حکومت نے مختلف شخصیات کے نام ایگزٹ کنٹرول لسٹ (ای سی ایل) میں شامل کرنے کی منظوری دے دی ہے۔

ذرائع کے مطابق حکومت نے بانی پی ٹی آئی کے علاوہ شاہ محمود قریشی، عمر ایوب، فواد چوہدری اور شبلی فراز کے نام بھی ای سی ایل میں شامل کر لیے ہیں۔ ذرائع کا کہنا ہے کہ یہ فیصلہ فسادات سے متعلق جاری تحقیقات اور ممکنہ قانونی کارروائیوں کے پیشِ نظر کیا گیا ہے۔

مزید بتایا گیا ہے کہ علی امین گنڈا پور، شہریار آفریدی اور عثمان ڈار کے نام بھی ای سی ایل فہرست میں ڈالے گئے ہیں۔ اسی طرح خواتین رہنماؤں میں شیریں مزاری، زرتاج گل، مسرت چیمہ اور کنول شوزب کے نام بھی بیرون ملک سفر پر پابندی کی اس فہرست کا حصہ بنا دیے گئے ہیں۔ ذرائع کا کہنا ہے کہ اس فہرست کو حتمی شکل دینے کے لیے متعلقہ حکام نے تمام پہلوؤں کا جائزہ لیا۔

یہ بھی پڑھیں: تحریک انصاف دہشتگردی کیخلاف جنگ کی کھلی مخالفت کرتی ہے، وزیر دفاع

اطلاعات کے مطابق محکمہ داخلہ پنجاب نے فسادات کے واقعات کے پیش نظر متعلقہ فہرست اور سفارشات وفاقی حکومت کو بھیجی تھیں، جس کے بعد ای سی ایل میں نام شامل کرنے کا فیصلہ کیا گیا۔ حکام کے مطابق یہ اقدام اس لیے بھی ضروری سمجھا گیا تاکہ 9 مئی کے واقعات کی شفاف تحقیقات کو یقینی بنایا جا سکے اور متعلقہ افراد کی دستیابی برقرار رہے۔

خیال رہے کہ ای سی ایل کمیٹی نے تمام سفارشات وفاقی حکومت کو منظوری کے لیے بھجوائی تھیں، جس کے بعد حکومت نے باضابطہ طور پر ان ناموں کو فہرست میں شامل کرنے کی اجازت دے دی۔ اس فیصلے کے بعد مذکورہ رہنما بیرون ملک سفر نہیں کر سکیں گے، جبکہ حکومتی سطح پر مزید اقدامات سے متعلق بھی غور جاری ہے۔