ملک بھر میں سونے کی قیمتوں میں کمی کا سلسلہ تیسرے روز بھی جاری رہا، جس کے باعث زیورات خریدنے والوں اور سرمایہ کاروں کی توجہ ایک بار پھر مقامی مارکیٹ پر مرکوز ہو گئی ہے۔ حالیہ تین دنوں کے دوران سونے کے فی تولہ نرخ میں مجموعی طور پر 18 ہزار 700 روپے کی نمایاں کمی ریکارڈ کی گئی ہے، جو حالیہ مہینوں کی بڑی گراوٹوں میں شمار کی جا رہی ہے۔
اعداد و شمار کے مطابق گزشتہ روز ہی سونے کی قیمت میں 10 ہزار 700 روپے فی تولہ کی بڑی کمی ہوئی تھی، جب کہ آج مزید 2 ہزار 500 روپے کی کمی دیکھنے میں آئی ہے۔ اس تازہ کمی کے بعد ملک میں سونے کی فی تولہ نئی قیمت 4 لاکھ 56 ہزار 962 روپے پر آ گئی ہے، قیمتوں میں اس تسلسل کے ساتھ کمی نے مارکیٹ میں سرگرمی بڑھا دی ہے اور خریدار محتاط مگر پُرامید نظر آ رہے ہیں۔
اسی طرح دس گرام سونے کی قیمت میں بھی کمی ریکارڈ کی گئی ہے، آج دس گرام سونا 2 ہزار 143 روپے سستا ہو گیا، جس کے بعد اس کی نئی قیمت 3 لاکھ 91 ہزار 771 روپے کی سطح پر پہنچ گئی ہے۔ جیولرز کے مطابق اگر یہی رجحان برقرار رہا تو آئندہ دنوں میں سونے کی خرید و فروخت میں مزید تیزی آ سکتی ہے۔
عالمی سطح پر بھی سونے کی قیمتوں میں کمی دیکھنے میں آئی ہے، جس کا اثر براہِ راست مقامی مارکیٹ پر پڑا ہے۔ بین الاقوامی مارکیٹ میں سونے کے نرخ میں 25 ڈالر فی اونس کی کمی ہوئی، جس کے بعد سونے کی نئی عالمی قیمت 4 ہزار 346 ڈالر فی اونس ہو گئی ہے۔ ماہرین کے مطابق عالمی معاشی حالات، ڈالر کی قدر میں اتار چڑھاؤ اور سرمایہ کاروں کا محتاط رویہ اس کمی کی اہم وجوہات میں شامل ہیں۔
دوسری جانب چاندی کی قیمتوں میں بھی کمی کا رجحان دیکھا گیا ہے آج چاندی کے فی تولہ نرخ میں 212 روپے کی کمی ہوئی، جس کے بعد چاندی کی نئی قیمت 7 ہزار 718 روپے فی تولہ مقرر ہو گئی ہے، چاندی کی قیمت میں کمی نے بھی چھوٹے سرمایہ کاروں کو متحرک کیا ہے۔
مارکیٹ ماہرین کا کہنا ہے کہ اگر عالمی مارکیٹ میں دباؤ برقرار رہا تو مقامی سطح پر سونے اور چاندی کی قیمتوں میں مزید رد و بدل ہو سکتا ہے تاہم خریداروں کو مشورہ دیا جا رہا ہے کہ وہ مارکیٹ کی صورتحال پر نظر رکھتے ہوئے فیصلہ کریں، کیونکہ قیمتی دھاتوں کی قیمتیں تیزی سے بدل سکتی ہیں۔
By 
