سادگی اور عاجزی کی مثال، نئے آئی جی آزاد کشمیر لیاقت علی بغیر پروٹوکول کوہالہ پل پہنچ گئے، اہلکار متاثر

نئے تعینات ہونے والے انسپکٹر جنرل پولیس آزاد کشمیر لیاقت علی نے سادگی اور عاجزی کی ایک نئی مثال قائم کرتے ہوئے بغیر کسی پروٹوکول اور سرکاری گاڑیوں کے قافلے کے آزاد کشمیر میں داخل ہوئے ہیں جہاں کوہالہ پل پر قائم پولیس ناکے پر موجود اہلکاروں نے انہیں ایک عام شہری سمجھ کر روک لیا۔

ذرائع کے مطابق نئے آئی جی آزاد کشمیر لیاقت علی عام لباس میں ناکے پر موجود پولیس اہلکاروں کے ساتھ گھل مل گئے۔ اس موقع پر پولیس اہلکاروں کو یہ علم نہیں تھا کہ وہ جس شخص سے بات کر رہے ہیں وہ آزاد کشمیر کے نئے سربراہِ پولیس ہیں۔ جب لیاقت علی نے خود تعارف کرواتے ہوئے بتایا کہ وہ بطور آئی جی آزاد کشمیر چارج لینے آ رہے ہیں تو ناکے پر موجود اہلکار حیرت زدہ رہ گئے۔

پولیس اہلکاروں کا کہنا ہے کہ وہ اس بات پر دنگ رہ گئے کہ آزاد کشمیر کے نئے آئی جی نہایت سادہ مزاج، خوش اخلاق اور عام پولیس جوانوں جیسی طبیعت کے حامل ہیں۔ اس موقع پر لیاقت علی نے اہلکاروں سے گفتگو کرتے ہوئے کہا کہ ان کی اولین ترجیح پولیس فورس کے مسائل کا حل ہے اور سب سے پہلے پولیس کے جوانوں اور افسران کو درپیش مشکلات اور پریشانیوں کو دور کیا جائے گا، اس کے بعد دیگر انتظامی امور پر توجہ دی جائے گی۔

لیاقت علی کو پولیس فورس میں ایک ایسے افسر کے طور پر جانا جاتا ہے جو اپنے جوانوں کے ساتھ مضبوط تعلق رکھتے ہیں۔ وہ نہ صرف جوانوں میں مقبول ہیں بلکہ کئی مواقع پر افسران کے مقابلے میں جوانوں میں زیادہ پسند کیے جاتے ہیں۔ ان کا یہ رویہ انہیں ایک عوام دوست اور فورس دوست پولیس سربراہ کے طور پر نمایاں کرتا ہے۔

نئے آئی جی آزاد کشمیر کی اس سادہ اور غیر رسمی آمد نے فورس کے حوصلے جہان بلند کیے ہیں وہیں یہ پیغام بھی دیا ہے کہ قیادت اہلکاروں کے درمیان رہ کر مسائل حل کرنے پر یقین رکھتی ہے، نہ کہ صرف پروٹوکول اور اختیارات کے ذریعے۔

یہ بھی پڑھیں: افواجِ پاکستان مقبوضہ کشمیر اور بھارتی مسلمان کے لیے امید کی کرن ہیں، سابق ڈپٹی سیکرٹری مقبوضہ کشمیر فاروق کرمانی