پاکستان سپر لیگ میں پشاور زلمی کے اسپنر سفیان مقیم نے اس سیزن کے گزشتہ 5 میچوں میں مسلسل 3 یا 3 سے زائد وکٹیں حاصل کرنے کا ریکارڈ بنا دیا۔
گزشتہ روز پشاور زلمی نے نیشنل اسٹیڈیم کراچی میں گلیڈی ایٹرز کو 8 وکٹوں سے شکست دیدی ، اور یہ فتح سفیان مقیم کی شاندار باولنگ اور کپتان بابراعظم کی بیٹنگ کی بدولت حاصل ہوئی جس کے بعد پشاور زلمی رواں سیزن کے سیمی فائنل میں جگہ بنانے والی پہلی ٹیم بن گئی ہے۔
سفیان مقیم کی بہترین باولنگ کے نتیجے میں کوئٹہ گلیڈی ایٹرز کی ٹیم مقررہ 20 اوورز میں 154 رنز آؤٹ ہوگئی، کوئٹہ کے حسن نواز نے سب سے زیادہ 37 رنز بنائے جبکہ صفیان نے اپنے 4 اوورز کے کوٹے میں 25 رنز دے کر 3 وکٹیں حاصل کیں۔
پشاور زلمی لیگ کے رواں سیزن میں اب تک ناقابل شکست ہے اور کوئٹہ گلیڈی ایٹرز کے خلاف میچ میں سفیان مقیم کو میچ کا بہترین کھلاڑی قرار دیا گیا۔
سفیان مقیم نے اس سے قبل ملتان سلطانز کے خلاف 30 رنز دے کر 3 وکٹیں حاصل کی تھیں ، اسی طرح لاہور قلندرز کی 3 وکٹیں 21 رنز کے عوض حاصل کی تھیں۔
پشاور زلمی کے اسپنر نے کراچی کنگز کے خلاف صرف 18 رنز دے کر 3 وکٹیں حاصل کی تھیں، اس سے قبل حیدرآباد کنگزمین کے خلاف بھی شاندار باولنگ کا مظاہرہ کیا تھا جہاں انہوں نے اپنی بہترین کارکردگی دکھاتے کنگزمین کی 4 وکٹیں اڑائی تھیں۔
پی ایس ایل کی تاریخ میں سفیان مقیم مسلسل 5 میچوں میں 3 یا 3 سے زائد وکٹیں حاصل کرنے والے پہلے باولر بن گئے ہیں اور اب پشاور زلمی کا گروپ میچ 19 اپریل کو نیشنل اسٹیڈیم کراچی میں ہی کھیلا جائے گا۔
By 
