پاکستان سپر لیگ میں پہلی مرتبہ پشتو زبان میں کمنٹری کا آغاز کر دیا گیا ہے جسے ایونٹ کی تاریخ میں ایک اہم اور ثقافتی پیش رفت قرار دیا جا رہا ہے۔ اس اقدام کے تحت شائقین کرکٹ اب اپنی علاقائی زبان میں بھی میچز کی دلچسپ کمنٹری سے لطف اندوز ہو سکیں گے۔
منصوبہ پشاور زلمی کے اشتراک سے شروع کیا گیا ہے جس کے مطابق ٹیم کے بقیہ میچز میں پشتو کمنٹری ایک ڈیجیٹل پلیٹ فارم کے ذریعے نشر کی جائے گی۔ اس اقدام کا مقصد خیبرپختونخوا اور پشتو بولنے والے شائقین کو کھیل سے مزید قریب لانا اور انہیں اپنی زبان میں کھیل کا مکمل تجربہ فراہم کرنا ہے۔
پشاور زلمی کی ٹیم اس وقت ایونٹ کے اہم مرحلے میں داخل ہو چکی ہے اور کل اسلام آباد کے خلاف کوالیفائر میچ میں حصہ لے گی۔ اس میچ میں کامیابی کی صورت میں ٹیم براہِ راست فائنل کے لیے کوالیفائی کرے گی، جبکہ شکست کی صورت میں اسے ایلیمینٹر مرحلے میں جانا ہوگا۔پاکستان سپر لیگ کا گیارہواں ایڈیشن اپنے آخری مرحلے کی جانب بڑھ رہا ہے اور اس کا بڑا فائنل تین مئی کو لاہور کے قذافی اسٹیڈیم میں کھیلا جائے گا، جس کا شائقین بے صبری سے انتظار کر رہے ہیں۔
پاکستان سپر لیگ گزشتہ کئی سالوں سے مختلف زبانوں اور ڈیجیٹل پلیٹ فارمز کے ذریعے شائقین کو زیادہ سے زیادہ جوڑنے کی کوشش کر رہی ہے۔ پہلے اردو اور انگریزی میں کمنٹری کی جاتی تھی تاہم اب علاقائی زبانوں کی شمولیت سے کھیل کی رسائی مزید وسیع ہو رہی ہے۔ پشتو کمنٹری کا آغاز نہ صرف خیبرپختونخوا کے شائقین کے لیے ایک بڑی سہولت ہے بلکہ یہ پاکستان میں کھیلوں کی نشریات کو زیادہ جامع اور عوامی بنانے کی جانب ایک اہم قدم بھی سمجھا جا رہا ہے۔
By 
