پاکستان شوبز انڈسٹری کی معروف اداکارہ مومنہ اقبال کی شادی کی تقریبات سوشل میڈیا پر توجہ کا مرکز بنی ہوئی ہیں۔ دعا خیر، مہندی اور دیگر تقریبات کے بعد اب ان کی نکاح تقریب کی تصاویر بھی منظرِ عام پر آ گئی ہیں، جنہیں مداحوں کی جانب سے بے حد پسند کیا جا رہا ہے۔
مومنہ اقبال، جن کے انسٹاگرام پر تقریباً 20 لاکھ فالوورز موجود ہیں، پاکستانی ڈرامہ انڈسٹری کا ایک نمایاں نام ہیں۔ انہوں نے اپنے کیریئر میں متعدد کامیاب ڈراموں میں اداکاری کے جوہر دکھائے ہیں، جن میں میرے ہم نشین، عہدِ وفا، دستک، دو کنارے اور احسان فراموش شامل ہیں۔
لاہور میں منعقد ہونے والی نکاح تقریب میں مومنہ اقبال نے سنہری رنگ کا خوبصورت اور نفیس کڑھائی سے مزین لہنگا زیب تن کیا۔ ان کے عروسی لباس کے ساتھ بھاری دوپٹہ اور روایتی انداز میں اوڑھا گیا اضافی رسٹ رنگ کا دوپٹہ بھی شامل تھا، جس پر لیس اور گوٹا ورک نے لباس کی خوبصورتی میں مزید اضافہ کیا۔
اداکارہ نے اپنے برائیڈل لک کو روایتی زیورات سے مکمل کیا، جن میں ناتھ، ٹیکا، جھومر، گولڈ چوکر، ہار اور کنگن شامل تھے۔ دوسری جانب ان کے شوہر حمزہ حبیب سفید رنگ کی روایتی شیروانی اور کلہ میں ملبوس نظر آئے۔
نکاح کی تصاویر سوشل میڈیا پر وائرل ہوتے ہی مداحوں اور شوبز شخصیات نے جوڑے کے لیے نیک تمناؤں کا اظہار کیا۔ مومنہ اقبال کا روایتی عروسی انداز بھی سوشل میڈیا صارفین کی جانب سے خوب سراہا جا رہا ہے اور ان کا برائیڈل لک ٹرینڈنگ موضوع بن گیا ہے۔
By 
