ایرانی افواج ماضی کے مقابلے میں کہیں زیادہ مضبوط، کسی بھی صورتحال کا بھرپو جواب دینگے ، پاسداران انقلاب

ایران کی پاسدارانِ انقلاب نے کہا ہے کہ ملک کی مسلح افواج ہر قسم کی ممکنہ صورتحال کا سامنا کرنے کے لیے مکمل طور پر تیار ہیں اور اگر کسی بھی قسم کی جارحیت یا خطرے کا سامنا ہوا تو حالات کے مطابق ضروری حکمت عملی اختیار کرتے ہوئے بھرپور جواب دیا جائے گا۔

پاسدارانِ انقلاب کے ترجمان نے اپنے بیان میں کہا کہ ایران کی دفاعی صلاحیتوں میں گزشتہ برسوں کے دوران نمایاں اضافہ ہوا ہے اور آج ایرانی مسلح افواج ماضی کے مقابلے میں کہیں زیادہ مضبوط، منظم اور جدید وسائل سے لیس ہیں۔

انہوں نے کہا کہ یہ تیاری صرف عسکری سازوسامان تک محدود نہیں بلکہ عملی میدان میں حاصل ہونے والے تجربات اور مختلف چیلنجز سے نمٹنے کی صلاحیتوں کا بھی نتیجہ ہے۔

  یہ بھی پڑھیں :آبنائے ہرمز نہیں کھولی جائے گی ، پاسداران انقلاب نے خبردار کردیا

ترجمان کے مطابق ایرانی افواج نے مختلف حالات میں اپنی دفاعی حکمت عملی کا بارہا جائزہ لیا ہے اور بدلتے ہوئے علاقائی اور عالمی حالات کے مطابق اپنی تیاریوں کو مزید مؤثر بنایا ہے۔ انہوں نے کہا کہ ایران اپنی قومی سلامتی، خودمختاری اور سرحدوں کے تحفظ پر کوئی سمجھوتہ نہیں کرے گا اور کسی بھی خطرے کی صورت میں فوری اور مؤثر ردعمل دیا جائے گا۔

 یہ بھی پڑھییں :ایران نے مسلح افواج کے نئے سربراہ اور پاسداران انقلاب کے نئے چیف کا اعلان کردیا

بیان میں مزید کہا گیا کہ ایرانی مسلح افواج مسلسل مشقوں، جدید تربیت اور دفاعی منصوبہ بندی کے ذریعے اپنی صلاحیتوں کو بہتر بنا رہی ہیں۔ ترجمان نے دعویٰ کیا کہ ایرانی افواج نہ صرف روایتی دفاعی صلاحیت رکھتی ہیں بلکہ جدید جنگی تقاضوں اور نئی نوعیت کے خطرات سے نمٹنے کی مکمل استعداد بھی رکھتی ہیں۔

پاسدارانِ انقلاب کا یہ بیان ایسے وقت میں سامنے آیا ہے جب خطے میں کشیدگی اور سکیورٹی سے متعلق خدشات پر عالمی توجہ مرکوز ہے۔