عمان کیساتھ مل کر آبنائے ہرمز ، سمندری آمدورفت کی بحالی کیلئے مشترکہ نظام تشکیل دینگے ، ایران

ایران نے آبنائے ہرمز کے انتظام اور سمندری آمدورفت کی بحالی کے حوالے سے اہم اعلان کرتے ہوئے کہا ہے کہ عمان کے ساتھ مل کر ایک مشترکہ انتظامی نظام تشکیل دیا جائے گا تاکہ خطے میں بحری نقل و حرکت کو مؤثر اور منظم انداز میں چلایا جا سکے۔

ایرانی وزارت خارجہ کے ترجمان اسماعیل بقائی نے میڈیا بریفنگ میں کہا کہ تہران اور مسقط آبنائے ہرمز کے انتظام کے لیے مشترکہ میکنزم پر کام کریں گے۔ انہوں نے کہا کہ ضرورت پڑنے پر خطے کے دیگر ممالک سے بھی مشاورت کی جائے گی تاکہ بحری راستوں کی سلامتی اور استحکام کو یقینی بنایا جا سکے۔

ایران کی نیم سرکاری خبر رساں ایجنسی کے مطابق اسماعیل بقائی نے بتایا کہ دونوں ممالک کے درمیان اس بات پر اتفاق ہوا ہے کہ آبنائے ہرمز میں سمندری ٹریفک کو ایک مقررہ مدت کے اندر مکمل طور پر معمول پر لایا جائے گا۔ انہوں نے زور دیتے ہوئے کہا کہ اس اہم بحری گزرگاہ سے متعلق انتظامی اور عملی اقدامات ایران کی ذمہ داری ہیں اور ان امور میں کسی بیرونی طاقت یا فریق کی مداخلت کی ضرورت نہیں ہوگی۔

 یہ بھی پڑھیں :ایران نے آبنائے ہرمز سے جہازوں کے گزرنے سے متعلق بڑا اعلان کر دیا

ترجمان ایرانی وزارت خارجہ نے کہا کہ خطے کے استحکام اور بین الاقوامی تجارت کے تسلسل کے لیے آبنائے ہرمز کی اہمیت مسلمہ ہے اسی لیے ایران اس حوالے سے ذمہ دارانہ کردار ادا کرتا رہے گا۔ ان کے مطابق عمان کے ساتھ تعاون سے نہ صرف سمندری نقل و حمل میں بہتری آئے گی بلکہ خطے میں اعتماد سازی کے عمل کو بھی فروغ ملے گا۔

دوسری جانب اسماعیل بقائی نے ایران اور امریکا کے درمیان جاری سفارتی پیش رفت پر بھی اظہار خیال کیا۔ انہوں نے بتایا کہ دونوں ممالک کے درمیان مفاہمتی یادداشت پر دستخط کے مختلف امکانات زیر غور ہیں اور یہ تجویز بھی سامنے آئی ہے کہ اس دستاویز پر دونوں ممالک کے صدور دستخط کریں۔ تاہم اس حوالے سے ابھی حتمی فیصلہ نہیں کیا گیا اور مشاورت کا عمل جاری ہے۔