خیبرپختونخوا کے ضلع جنوبی وزیرستان میں سیکیورٹی فورسز نے ایک چیک پوسٹ پر دہشت گرد حملے کی کوشش ناکام بنا دی۔ پاک فوج کے شعبہ تعلقات عامہ (آئی ایس پی آر) کے مطابق بروقت اور مؤثر جوابی کارروائی کے نتیجے میں خودکش بمبار سمیت فتنہ الخوارج سے تعلق رکھنے والے چار دہشت گرد ہلاک ہو گئے، جبکہ کارروائی کے دوران سیکیورٹی فورسز کا کوئی جانی نقصان نہیں ہوا۔
آئی ایس پی آر کی جانب سے جاری بیان کے مطابق جنوبی وزیرستان میں سیکیورٹی فورسز کی ایک چیک پوسٹ پر بھارتی سرپرستی میں سرگرم فتنہ الخوارج سے تعلق رکھنے والے دہشت گردوں نے حملے کی کوشش کی۔ دہشت گرد دھماکا خیز مواد سے بھری ایک گاڑی کے ذریعے چیک پوسٹ کی سیکیورٹی توڑ کر اندر داخل ہونے کا ارادہ رکھتے تھے۔
بیان کے مطابق سیکیورٹی فورسز نے بروقت صورتحال کا جائزہ لیتے ہوئے فوری اور مؤثر کارروائی کی، جس کے نتیجے میں حملہ آوروں کا منصوبہ ناکام بنا دیا گیا۔ آئی ایس پی آر نے بتایا کہ فورسز نے چیک پوسٹ کے احاطے سے باہر ہی دھماکا خیز مواد سے بھری گاڑی کو نشانہ بنا کر تباہ کر دیا، جس کے نتیجے میں گاڑی میں موجود خودکش بمبار ہلاک ہو گیا، جبکہ چیک پوسٹ کو کسی قسم کا نقصان نہیں پہنچا۔
آئی ایس پی آر کے مطابق گاڑی تباہ ہونے کے بعد باقی تین دہشت گرد قریبی ایک عمارت میں جا کر چھپ گئے۔ اس کے بعد سیکیورٹی فورسز نے علاقے میں کلیئرنس آپریشن شروع کیا اور کارروائی کے دوران عمارت میں موجود تینوں دہشت گردوں کو ہلاک کر دیا۔
بیان میں کہا گیا ہے کہ اس کامیاب کارروائی کے دوران سیکیورٹی فورسز کا کوئی جانی نقصان نہیں ہوا۔ تاہم علاقے میں مزید دہشت گردوں کی موجودگی کے خدشے کے پیش نظر سرچ اور کلیئرنس آپریشن بدستور جاری ہے تاکہ علاقے کو مکمل طور پر محفوظ بنایا جا سکے۔
آئی ایس پی آر نے مزید کہا کہ وفاقی ایپکس کمیٹی کے منظور کردہ قومی ایکشن پلان کے تحت “عزمِ استحکام” کے وژن کے مطابق سیکیورٹی فورسز اور قانون نافذ کرنے والے ادارے ملک سے بیرونی سرپرستی میں ہونے والی دہشت گردی کے مکمل خاتمے تک انسداد دہشت گردی کی کارروائیاں پوری قوت سے جاری رکھیں گے۔
پاک فوج کے شعبہ تعلقات عامہ کے مطابق سیکیورٹی فورسز دہشت گردی کے خلاف اپنی کارروائیاں جاری رکھے ہوئے ہیں اور ملک میں امن و استحکام کے قیام کے لیے ہر ممکن اقدامات کیے جا رہے ہیں، جبکہ جنوبی وزیرستان میں جاری سرچ اور کلیئرنس آپریشن بھی اسی سلسلے کی ایک کڑی ہے۔
By 
