ایم جی کی پاکستان میں نئی گاڑی متعارف، قیمت کتنی ہوگی؟

اسلام آباد: ایم جی پاکستان نے سوشل میڈیا پر ایک ہفتے تک جاری رہنے والی مہم کے بعد دوسری جنریشن کی ایم جی ZS کو باضابطہ طور پر پاکستان میں لانچ کر دیا ہے۔ کمپنی نے نئی نسل کی اس ایس یو وی کو پہلی بار ہائبرڈ پاور ٹرین کے ساتھ متعارف کرایا ہے، جبکہ اس کا بنیادی ویریئنٹ روایتی 1500 سی سی پیٹرول انجن سے لیس ہے۔

کمپنی کی جانب سے نئی MG ZS کو تین مختلف ویریئنٹس میں پیش کیا گیا ہے جن میں وائب (Vibe)، ایکسائٹ (Hybrid+ Excite) اور ایسنس (Hybrid+ Essence) شامل ہیں۔ وائب بنیادی نان ہائبرڈ ماڈل ہے، جبکہ ایکسائٹ اور ایسنس جدید ہائبرڈ ٹیکنالوجی سے لیس ویریئنٹس ہیں۔

ایم جی پاکستان کے مطابق نئی نسل کی ZS پہلے ماڈل کے مقابلے میں زیادہ لمبی اور چوڑی ہے، جبکہ اسے مکمل طور پر نئے ڈیزائن کے ساتھ متعارف کرایا گیا ہے تاکہ صارفین کو بہتر انداز، زیادہ جگہ اور جدید خصوصیات فراہم کی جا سکیں۔

کمپنی نے بتایا ہے کہ ٹاپ آف دی لائن Hybrid+ Essence ویریئنٹ میں 1500 سی سی ہائبرڈ انجن دیا گیا ہے، جو 212 ہارس پاور اور 465 نیوٹن میٹر ٹارک پیدا کرتا ہے۔ اس ماڈل میں 1.83 کلو واٹ آور بیٹری اور 3 اسپیڈ ہائبرڈ ٹرانسمیشن بھی شامل کی گئی ہے۔

یہ بھی پڑھیں: موٹر سائیکل اور گاڑی خریدنا مہنگا ہوگیا، رجسٹریشن سے پہلے نئے چارجز نافذ

نئی ایم جی ZS میں متعدد جدید سہولیات فراہم کی گئی ہیں۔ ان میں پینورامک سن روف، 12.3 انچ انفوٹینمنٹ اسکرین، وائرلیس ایپل کار پلے اور اینڈرائیڈ آٹو، ڈیجیٹل انسٹرومنٹ کلسٹر، چھ ایئر بیگز، 360 ڈگری کیمرہ، ایڈوانسڈ ڈرائیور اسسٹنس سسٹم (ADAS)، الیکٹرک ٹیل گیٹ، وینٹی لیٹڈ سیٹس، ہیٹڈ سائیڈ مررز اور انٹیلیجنٹ ہیڈ لائٹ کنٹرول شامل ہیں۔

پاکستانی آٹو مارکیٹ میں نئی ہائبرڈ ایم جی ZS کا مقابلہ ہونڈا HR-V e، ٹویوٹا کرولا کراس HEV، ہیول جولیون، سوزوکی فرنکس مائلڈ ہائبرڈ اور جیکو J5 جیسی گاڑیوں سے ہوگا، جبکہ اس کا نان ہائبرڈ ویریئنٹ دیگر سب کمپیکٹ ایس یو ویز کے مقابلے میں دستیاب ہوگا۔

کمپنی نے نئی ایم جی ZS کی ابتدائی ایکس فیکٹری قیمتوں کا بھی اعلان کر دیا ہے۔ Vibe ویریئنٹ کی قیمت 65 لاکھ 99 ہزار روپے مقرر کی گئی ہے، جبکہ Hybrid+ Excite کی قیمت 70 لاکھ 99 ہزار روپے اور Hybrid+ Essence کی قیمت 74 لاکھ 99 ہزار روپے رکھی گئی ہے۔ کمپنی کے مطابق تینوں ویریئنٹس کی بکنگ 12 لاکھ روپے سے شروع ہوگی۔

یہ بھی پڑھیں: انتہائی کم قیمت اور جدید فیچرز، بی وائے ڈی نے نئی چھوٹی الیکٹرک گاڑی متعارف کرا دی

ایم جی پاکستان کا کہنا ہے کہ یہ قیمتیں محدود مدت کے لیے متعارف کرائی گئی ہیں اور مستقبل میں ٹیکسوں میں کسی ممکنہ اضافے سے متاثر نہیں ہوں گی۔ کمپنی کے مطابق نئی ZS کی ڈیلیوری کا آغاز ستمبر 2026 سے کیا جائے گا۔