پیٹرول اور ڈیزل کی قیمت میں کمی، اوگرا نے نوٹیفکیشن جاری کردیا

وفاقی حکومت نے پیٹرولیم مصنوعات کی قیمتوں کے روزانہ تعین کی پالیسی کے تحت یکم اگست کے لیے پیٹرول اور ہائی اسپیڈ ڈیزل کی قیمتوں میں معمولی کمی کا اعلان کر دیا۔ آئل اینڈ گیس ریگولیٹری اتھارٹی (اوگرا) نے وفاقی حکومت کی منظوری کے بعد نئی قیمتوں کا باضابطہ نوٹیفکیشن جاری کر دیا۔

نوٹیفکیشن کے مطابق پیٹرول کی قیمت میں 12 پیسے فی لیٹر جبکہ ہائی اسپیڈ ڈیزل کی قیمت میں 66 پیسے فی لیٹر کمی کی گئی ہے۔ اس کمی کے بعد پیٹرول کی نئی قیمت 336 روپے 3 پیسے فی لیٹر جبکہ ہائی اسپیڈ ڈیزل کی نئی قیمت 392 روپے 38 پیسے فی لیٹر مقرر کر دی گئی ہے۔

روزانہ قیمتوں کے تعین کی نئی پالیسی

حکومت ماضی میں عالمی منڈی میں خام تیل کی قیمت، درآمدی لاگت، روپے کی قدر اور ٹیکسوں کو مدنظر رکھتے ہوئے ہر 15 روز بعد پیٹرولیم مصنوعات کی قیمتوں کا جائزہ لیتی تھی، تاہم امریکا۔ایران کشیدگی کے بعد عالمی منڈی میں تیل کی قیمتوں میں تیزی سے اتار چڑھاؤ کے باعث پالیسی تبدیل کر دی گئی۔

17 جولائی کو وفاقی وزیر پیٹرولیم علی پرویز ملک نے اعلان کیا تھا کہ اب پیٹرولیم مصنوعات کی قیمتوں کا تعین روزانہ کی بنیاد پر کیا جائے گا، جبکہ اوگرا روزانہ نئی قیمتیں اپنی ویب سائٹ پر جاری کرے گی۔

یہ بھی پڑھیں: مشرق وسطیٰ کشیدگی کے اثرات، عالمی مارکیٹ میں خام تیل مزید مہنگا ہوگیا

جولائی میں قیمتوں میں مسلسل رد و بدل

روزانہ قیمتوں کے تعین کی پالیسی کے نفاذ کے بعد 17 جولائی کو پیٹرول کی قیمت میں 5 روپے 44 پیسے اور ہائی اسپیڈ ڈیزل کی قیمت میں 31 روپے 5 پیسے فی لیٹر اضافہ کیا گیا، جس کے بعد پیٹرول 316 روپے 15 پیسے اور ڈیزل 354 روپے 35 پیسے فی لیٹر ہو گیا تھا۔

20 جولائی کو حکومت نے پیٹرول 35 پیسے فی لیٹر سستا کیا، تاہم اسی روز ڈیزل 5 روپے 71 پیسے فی لیٹر مہنگا کر دیا گیا۔

21 جولائی کو ایک مرتبہ پھر پیٹرول کی قیمت میں 4 روپے 93 پیسے جبکہ ڈیزل کی قیمت میں 7 روپے 15 پیسے فی لیٹر اضافہ کیا گیا۔

22 جولائی کو بھی اضافہ جاری رہا اور پیٹرول 6 روپے 39 پیسے جبکہ ہائی اسپیڈ ڈیزل 7 روپے 83 پیسے فی لیٹر مہنگا کیا گیا۔

اس کے بعد بھی عالمی منڈی میں خام تیل کی قیمتوں میں اتار چڑھاؤ کے باعث مختلف دنوں میں پیٹرولیم مصنوعات کی قیمتوں میں مسلسل رد و بدل کیا جاتا رہا، تاہم یکم اگست کے لیے جاری نوٹیفکیشن کے تحت حکومت نے عوام کو معمولی ریلیف دیتے ہوئے دونوں بڑی پیٹرولیم مصنوعات کی قیمتوں میں کمی کر دی ہے۔

عالمی منڈی سے منسلک قیمتیں

توانائی ماہرین کے مطابق روزانہ قیمتوں کے تعین کے نظام کے تحت عالمی منڈی میں خام تیل کی قیمت، درآمدی لاگت، روپے کی قدر اور دیگر متعلقہ عوامل کے اثرات نسبتاً تیزی سے مقامی مارکیٹ تک منتقل ہوں گے، جس کے باعث آئندہ بھی پیٹرولیم مصنوعات کی قیمتوں میں روزانہ بنیادوں پر رد و بدل کا امکان برقرار رہے گا۔