لاہور : تھانوں میں خواتین سے متعلق معاملات ترجیحی بنیادوں پر نمٹائے جائیں، ڈی آئی جی آپریشنز کی اہم ہدایات جاری

 ڈی آئی جی آپریشنز لاہور فیصل کامران نے خواتین کے تحفظ، عزت و وقار اور قانونی حقوق کو یقینی بنانے کے لیے تمام تھانہ جات میں اہم ہدایت جاری کر دی ہے۔

اس حوالے سے سپروائزری افسران اور ایس ایچ اوز کو مراسلہ ارسال کر دیا گیا ہے، جس میں خواتین سے متعلق تمام معاملات کو ترجیحی بنیادوں پر نمٹانے پر زور دیا گیا ہے۔

ڈی آئی جی آپریشنز کی جانب سے جاری مراسلے کے مطابق کسی بھی خاتون سے پوچھ گچھ، بیان یا تفتیش کے دوران لیڈی پولیس اہلکار کی موجودگی ہر صورت یقینی بنائی جائے گی۔ اس کے علاوہ کسی بھی خاتون کو غروبِ آفتاب کے بعد درخواست، انکوائری یا تفتیش کے لیے تھانے طلب نہیں کیا جائے گا، جبکہ خواتین سے متعلق تمام درخواستوں ، انکوائریوں اور قانونی کارروائیوں کو حتی الامکان غروبِ آفتاب سے پہلے مکمل کیا جائے۔

ہدایات میں کہا گیا ہے کہ اگر کسی حساس نوعیت کے واقعے کے باعث خاتون کو غروبِ آفتاب کے بعد تھانے میں آنیوالی خاتون کا مسئلہ صرف لیڈی پولیس افسر کی موجودگی میں سن کر اسے روانہ کیا جائے۔

مزید برآں، تفتیشی افسر کسی بھی خاتون کو تھانے بلانے سے قبل ایس ایچ او کو پیشگی اطلاع دینے کا پابند ہوگا۔

یہ بھی پڑھیں :مون سون کا نیا اسپیل کل سے آنے کو تیار ، پی ڈی ایم اے نے خبردار کردیا

ڈی آئی جی آپریشنز نے واضح کیا ہے کہ پولیس رولز کے مطابق ہر تھانے کا ماحول محفوظ، باوقار اور قانون کے مطابق رکھنا ایس ایچ او کی  ذمہ داری ہے، کسی بھی تھانے میں غفلت، لاپرواہی یا غیر ذمہ دارانہ طرز عمل پر متعلقہ افسر جوابدہ ہونگے۔ تمام سپروائزری افسران کو لیڈی پولیس اہلکاروں کی تھانوں میں موجودگی یقینی بنانے، ڈیوٹی روسٹر چیک کرنے اور سی سی ٹی وی کیمروں کو فعال رکھنے کی بھی ہدایت کی گئی ہے۔

مراسلے میں مزید کہا گیا ہے کہ تھانوں میں موجود انویسٹی گیشن، آپریشنز اور ٹریفک سمیت تمام ونگز کی سرگرمیوں کی نگرانی بھی ایس ایچ او کی ذمہ داری ہوگی۔ خواتین سے متعلق ہر شکایت کو حساسیت، شفافیت اور قانون کے مطابق نمٹانے اور ان کے ساتھ عزت، احترام اور پیشہ ورانہ رویہ اختیار کرنے کی تاکید کی گئی ہے۔

ڈی آئی جی آپریشنز کی ہدایات میں یہ بھی کہا گیا کہ تمام سپروائزری افسران اپنے ماتحت تھانہ جات میں ان احکامات پر عملدرآمد کی باقاعدہ نگرانی کے پابند ہیں، خلاف ورزی پر ذمہ دار افسران و اہلکاروں کے خلاف بلاامتیاز سخت محکمانہ اور قانونی کارروائی عمل میں لائی جائے گی۔