پاکستان کرکٹ چھوڑنے کی خبریں ، خوشدل شاہ نے خاموشی توڑ دی

پاکستان کے آل راؤنڈر خوشدل شاہ نے پاکستان کرکٹ چھوڑنے سے متعلق سوشل میڈیا پر گردش کرنے والی خبروں پر خاموشی توڑتے ہوئے انہیں جعلی اور بے بنیاد قرار دے دیا ہے۔

سوشل میڈیا پر گزشتہ کچھ عرصے سے یہ خبریں گردش کر رہی تھیں کہ خوشدل شاہ پاکستان کرکٹ چھوڑنے کا فیصلہ کر رہے ہیں تاہم اب قومی آل راؤنڈر نے خود ان خبروں کی تردید کرتے ہوئے اپنا واضح مؤقف سامنے رکھ دیا ہے۔

سماجی رابطے کی ویب سائٹ ایکس پر اپنے پیغام میں خوشدل شاہ نے کہا کہ یہ جعلی خبریں گردش کر رہی ہیں، جن میں دعویٰ کیا جا رہا ہے کہ وہ پاکستان کرکٹ چھوڑ رہے ہیں، تاہم یہ بات بالکل غلط ہے۔

There’s fake news going around claiming I’m leaving Pakistan cricket and it’s completely untrue. Pakistan is my home, and representing this country has always been my top priority and greatest honor. Please don’t believe these baseless rumors. My commitment to Pakistan cricket…

— Khushdil Shah (@KhushdilShah_) August 7, 2026

خوشدل شاہ نے اپنے بیان میں واضح کیا کہ پاکستان ان کا گھر ہے اور ملک کی نمائندگی کرنا ہمیشہ ان کی اولین ترجیح اور ان کے لیے سب سے بڑا اعزاز رہا ہے۔ انہوں نے اس بات پر بھی زور دیا کہ پاکستان کرکٹ سے ان کی وابستگی میں کبھی کوئی تبدیلی نہیں آئی۔

قومی آل راؤنڈر نے عوام اور اپنے مداحوں سے اپیل کی کہ وہ ایسی بے بنیاد افواہوں پر یقین نہ کریں،  پاکستان کرکٹ کے ساتھ ان کی وابستگی ماضی کی طرح برقرار ہے اور مستقبل میں بھی اس میں کسی قسم کی تبدیلی نہیں آئے گی۔

یہ بھی پڑھیں :وسیم اکرم کی وفات کی جعلی خبریں وائرل ، شنیرا اکرم نے ویڈیو کے ذریعے حقیقت بتا دی

خوشدل شاہ کی جانب سے وضاحت سامنے آنے کے بعد پاکستان کرکٹ چھوڑنے سے متعلق سوشل میڈیا پر گردش کرنے والی قیاس آرائیوں کا خاتمہ ہوگیا ہے۔

واضح رہے کہ خوشدل شاہ نے آخری مرتبہ پاکستان کی نمائندگی گزشتہ سال ایشیا کپ کے گروپ مرحلے میں متحدہ عرب امارات کے خلاف میچ میں کی تھی۔