پیٹرول اور ڈیزل کی قیمت میں بڑا اضافہ

حکومت نے مسلسل دوسرے روز بھی پٹرولیم مصنوعات کی قیمتوں میں اضافہ کردیا، جس کے بعد پٹرول اور ہائی اسپیڈ ڈیزل مزید مہنگے ہوگئے۔ پٹرولیم ڈویژن نے نئی قیمتوں کا نوٹیفکیشن جاری کردیا۔

نوٹیفکیشن کے مطابق پٹرول کی قیمت میں 5 روپے 58 پیسے فی لیٹر جبکہ ہائی اسپیڈ ڈیزل کی قیمت میں 4 روپے 18 پیسے فی لیٹر اضافہ کیا گیا ہے۔ اضافے کے بعد پٹرول کی نئی قیمت 364 روپے 35 پیسے فی لیٹر جبکہ ہائی اسپیڈ ڈیزل کی قیمت 385 روپے 95 پیسے فی لیٹر مقرر کردی گئی ہے۔

نئی قیمتوں کا اطلاق فوری طور پر کردیا گیا ہے۔

اس سے ایک روز قبل بھی حکومت نے پٹرولیم مصنوعات کی قیمتوں میں بڑا اضافہ کیا تھا۔ گزشتہ روز پٹرول کی قیمت میں 12 روپے 90 پیسے اور ہائی اسپیڈ ڈیزل کی قیمت میں 3 روپے 72 پیسے فی لیٹر اضافہ کیا گیا تھا، جس کے بعد پٹرول 358 روپے 77 پیسے اور ڈیزل 381 روپے 77 پیسے فی لیٹر ہوگیا تھا۔

یہ بھی پڑھیں: پیٹرول مہنگا ہوتے ہی گڈز ٹرانسپورٹرز نے کرایے بڑھا دیے

حالیہ مسلسل اضافوں کے باعث پٹرول کی قیمت میں نمایاں اضافہ ہوا ہے، جس سے شہریوں کے سفری اخراجات بڑھنے کا امکان ہے، جبکہ ڈیزل مہنگا ہونے سے مال برداری اور پبلک ٹرانسپورٹ کے اخراجات بھی متاثر ہوسکتے ہیں۔

حکومت کے مطابق مشرقِ وسطیٰ کی صورتحال کے باعث پٹرولیم مصنوعات کی قیمتوں میں مسلسل ردوبدل کیا جا رہا ہے۔ عالمی منڈی میں تیل کی قیمتوں میں تیزی سے ہونے والی تبدیلیوں کے پیش نظر قیمتوں کے روزانہ تعین کا طریقہ کار اختیار کیا گیا ہے، جبکہ ہفتہ اور اتوار کو قیمتیں برقرار رکھنے کا طریقہ کار بھی نافذ ہے۔

17 جولائی سے اب تک پٹرول کی قیمت میں 14 مرتبہ کمی اور 21 مرتبہ اضافہ کیا جاچکا ہے، جبکہ ہائی اسپیڈ ڈیزل کی قیمت میں 10 مرتبہ کمی اور 21 مرتبہ اضافہ ہوا ہے۔