اے آئی تصاویر میں بڑی تبدیلی، اوپن اے آئی نے امیجز 2.5 لانچ کردیا

ٹیکنالوجی کمپنی اوپن اے آئی نے تصاویر بنانے کے لیے اپنا نیا ماڈل چیٹ جی پی ٹی امیجز 2.5 متعارف کرا دیا ہے، جسے کمپنی نے جدید ترین امیج جنریشن ٹیکنالوجی قرار دیا ہے۔

نیا ماڈل چیٹ جی پی ٹی، چیٹ جی پی ٹی ورک اور کوڈیکس میں دستیاب ہوگا۔ کمپنی کے مطابق چیٹ جی پی ٹی امیجز 2.5 میں پہلے کے ماڈل کے مقابلے میں تصاویر تیزی سے بنانے کے ساتھ ساتھ ایڈیٹنگ اور تصویر میں موجود کرداروں اور اشیا کو برقرار رکھنے کی صلاحیت بھی بہتر کی گئی ہے۔

اوپن اے آئی کے مطابق نئے ماڈل میں روشنی اور ٹیکسچرز کو زیادہ حقیقت کے قریب دکھانے پر خاص توجہ دی گئی ہے۔ اس کے علاوہ اگر کسی تصویر میں کئی مرتبہ تبدیلیاں کی جائیں تو کردار یا کسی مخصوص چیز کی شکل کو پہلے کے مقابلے میں زیادہ مستقل رکھا جاسکتا ہے۔

یہ بھی پڑھیں:بینک اکاؤنٹس کا حیران کن استعمال،ایف آئی اے نے 2 ملزمان کو دھر لیا

سادہ خاکے سے بھی بنوائیں اپنی مطلوبہ تصویر

نئے ماڈل میں ایک اسکیچ ٹول بھی شامل کیا گیا ہے۔ اس کے ذریعے صارف کسی تصویر یا لے آؤٹ کا سادہ سا خاکہ بنا کر اسے ٹیکسٹ پرامپٹ کے ساتھ بطور بصری رہنمائی استعمال کرسکتا ہے۔

مثال کے طور پر صارف کسی پوسٹر، پروڈکٹ یا سوشل میڈیا پوسٹ کا بنیادی خاکہ خود بنا سکتا ہے اور پھر ٹیکسٹ میں بتا سکتا ہے کہ اسے کس انداز میں مکمل کرنا ہے۔ ماڈل اسی خاکے اور ہدایات کو سامنے رکھتے ہوئے تصویر تیار کرے گا۔

تصویر کے ساتھ پرامپٹ بھی شیئر کیا جاسکے گا

اپ ڈیٹ میں پرامپٹ شیئرنگ کی سہولت بھی شامل کی گئی ہے۔ اس کے تحت صارف تصویر شیئر کرتے وقت اس تصویر کو بنانے کے لیے استعمال کیا گیا اصل پرامپٹ بھی دوسروں کے ساتھ شیئر کرسکتا ہے۔اس سہولت سے دوسرے صارفین کسی تصویر کے آئیڈیا کو سمجھ کر اسے اپنی ضرورت کے مطابق تبدیل کرکے دوبارہ استعمال کرسکیں گے۔

امیجز 2.5 کے دو نئے ماڈلز

اوپن اے آئی نے چیٹ جی پی ٹی امیجز 2.5 فیملی میں دو ماڈلز متعارف کرائے ہیں۔ جی پی ٹی امیج 2.5 فلیئر تیز رفتار سے بڑی تعداد میں تصاویر بنانے کے لیے تیار کیا گیا ہے۔ یہ خاص طور پر سوشل میڈیا مواد اور ایسے کاموں کے لیے مفید ہوگا جہاں مختصر وقت میں کئی تصاویر درکار ہوں۔

دوسرا ماڈل جی پی ٹی امیج 2.5 سن برسٹ زیادہ تفصیلی اور اعلیٰ معیار کی تصاویر کے لیے بنایا گیا ہے۔ کمپنی کے مطابق اسے مہماتی ویژولز، بہتر پروڈکٹ امیجز اور ایسے تخلیقی کاموں کے لیے استعمال کیا جاسکتا ہے جہاں تصویر کی تفصیل زیادہ اہم ہو۔

یہ بھی پڑھیں:برتن ساتھ لے جانا پڑ گیا مہنگا،امریکہ پہنچتے ہی پاکستانی فیملی ڈی پورٹ

اوپن اے آئی کے مطابق نئے ماڈلز ڈیسک ٹاپ، موبائل اور ویب پر دستیاب ہوں گے۔ کمپنی نے یہ بھی بتایا ہے کہ نئے ماڈلز کی آمد کے ساتھ امیجز 2.0 اور پرانا ڈی اے ایل ای امیج فلو مرحلہ وار ریٹائر کیا جارہا ہے۔

نئے ماڈل کی خاص بات یہ ہے کہ اب مصنوعی ذہانت سے صرف ایک ہدایت کے ذریعے تصویر بنوانے کے بجائے صارف خاکہ، ٹیکسٹ اور پہلے سے موجود تصویر کو ملا کر زیادہ مخصوص نتیجہ حاصل کرسکتا ہے، جس سے سوشل میڈیا، اشتہارات، ڈیزائن اور پروڈکٹ پریزنٹیشن کے لیے اے آئی تصاویر کا استعمال مزید آسان ہونے کی توقع ہے۔