خلا سے ستاروں کا منفرد نظارہ، قطبی روشنیوں نے منظر مزید حسین بنا دیا

خلا کی وسعتوں سے زمین اور آسمان کے مناظر ہمیشہ ہی حیران کن ہوتے ہیں، تاہم ناسا کے خلاباز انیل مینن نے خلا سے ایک ایسا خوبصورت منظر شیئر کیا ہے جس نے دیکھنے والوں کی توجہ حاصل کرلی۔

انیل مینن نے خلائی اسٹیشن سے ’اسٹار ٹریلز‘ یعنی طویل ایکسپوژر کے دوران ستاروں کی بظاہر حرکت سے بننے والے روشنی کے نشانات کی ویڈیو شیئر کی ہے۔ اس منظر میں سبز اور سنہری رنگوں کی خوبصورت قطبی روشنیاں بھی دکھائی دیتی ہیں۔ ناسا کے خلاباز نے یہ ویڈیو سماجی رابطے کی ویب سائٹ ایکس پر شیئر کرتے ہوئے اسے ’ہیپی اسٹار ٹریلز‘ یعنی خوشگوار اسٹار ٹریلز کا لمحہ قرار دیا۔

یہ بھی پڑھیں:پورے انٹرنیٹ کو ہائی جیک کرنے کا خدشہ، اے آئی کے خطرات پر نئی وارننگ

ویڈیو میں خلا سے نظر آنے والے ستارے روشنی کی لمبی لکیروں کی صورت میں دکھائی دیتے ہیں، جبکہ پس منظر میں قطبی روشنیوں کے سبز اور سنہری رنگ منظر کو مزید دلکش بنا دیتے ہیں۔ اسٹار ٹریلز دراصل زمین کی گردش اور کیمرے کے طویل ایکسپوژر کی وجہ سے تصاویر یا ویڈیوز میں ستاروں کے راستوں کی شکل میں نظر آتے ہیں۔ خلا سے اس منظر کا مشاہدہ اسے مزید منفرد بنا دیتا ہے۔

انیل مینن نے خلا میں دلچسپی رکھنے والے افراد سے کہا کہ وہ ایسے مزید حیرت انگیز مناظر کے لیے جڑے رہیں۔ انہوں نے بتایا کہ خلاباز جیسیکا میئر ’آئی آف دی ڈریگن‘ سے کچھ شاندار مناظر ریکارڈ کرنے پر کام کر رہی ہیں۔ خلاء سے ریکارڈ کیا گیا یہ منظر نہ صرف سائنسی لحاظ سے دلچسپ ہے بلکہ کائنات کی خوبصورتی کا ایک ایسا نظارہ بھی پیش کرتا ہے جو زمین سے عام طور پر اس انداز میں دیکھنا ممکن نہیں۔