تیل کی قیمتوں میں بے تحاشہ اضافے کا ذمہ دار خود امریکا ہے، ترجمان ایرانی وزارت خارجہ

ایرانی وزارتِ خارجہ کے ترجمان اسماعیل بقائی نے عالمی سطح پر ایندھن کی بڑھتی قیمتوں کا ذمہ دار ایران کو قرار دینے والے امریکی حکام کوآڑے ہاتھوں لے لیا۔

سماجی رابطے کی ویب سائٹ ایکس پر ایک بیان میں ترجمان ایرانی وزارتِ خارجہ نے کہا ہے کہ تیل کی قیمتوں میں بے تحاشہ اضافے کی بنیادی وجہ خود امریکا ہے،  امریکی حکام ایندھن کی بڑھتی قیمتوں کا الزام ایران پر عائد کر رہے ہیں، گویا عوام کی یادداشت اتنی مختصر ہے کہ وہ یہ بھول جائیں کہ جنگ کا آغاز دراصل کس نے کیا تھا اور کن اقدامات کے نتیجے میں وہ بحران پیدا ہوا جس کے باعث آبنائے ہرمز کی بندش اور تجارتی بحری جہازوں کی آمد و رفت میں خلل پیدا ہوا۔

U.S. officials blame Iran for rising fuel prices, as if the public’s memory is short enough to forget who actually initiated the war of aggression, and whose actions created the crisis that led to the closure of the Strait of Hormuz and the disruption of commercial shipping.…

— Esmaeil Baqaei (@IRIMFA_SPOX) September 22, 2026

انہوں نے کہا ہے کہ یہ کوئی نیا حربہ نہیں، 1939ء میں ہٹلر نے بھی پولینڈ پر اپنے حملے کو دفاعی اقدام کے طور پر پیش کیا تھا۔

یہ بھی پڑھیں: امریکیوں کا ٹرمپ پر عدم اعتماد بڑھ گیا، مقبولیت کی شرح میں مزید کمی

ترجمان ایرانی وزارتِ خارجہ نے سوال اٹھایا ہے کہ جب اپنی مرضی سے غیر قانونی جنگ کا آغاز کرنے والا فریق اس کے نتیجے میں پیدا ہونے والے بحران کا الزام متاثرہ فریق پر عائد کرے تو کیا اس حکمتِ عملی کو غیر معمولی مہارت قرار دیا جانا چاہیے یا پھر یہ محض مارچ آف فولی (حماقت کی پیش قدمی) کی ایک روایتی مثال ہے؟

اسماعیل بقائی نے اس سے قبل ایک اور پوسٹ میں بتایا تھا کہ ایرانی وزیرِ خارجہ عباس عراقچی یو این جنرل اسمبلی اجلاس کے لیے نیویارک پہنچ گئے ہیں،  عباس عراقچی نیویارک میں دیگر حکام اور وزرائے خارجہ کے ساتھ بات چیت اور مشاورت کریں گے۔

یہ بھی پڑھیں: طاقت اور دباؤ کے ذریعے مطالبات منوانے والا یکطرفہ عالمی نظام اب ختم ہو چکا ، ایرانی سپیکرباقر قالیباف

دوسری جانب ایرانی صدر اقوامِ متحدہ کی جنرل اسمبلی کے اجلاس میں شرکت اور ایران کے مؤقف کو پیش کرنے کے لیے روانہ ہوئے ، روانگی سے قبل انہوں نے میڈیا سے گفتگو کرتے ہوئے کہا کہ ہم کئی مرتبہ مذاکرات کی میز پر گئے اور معاہدوں پر دستخط کیے، لیکن بدقسمتی سے پوری دنیا نے دیکھا کہ وعدوں اور معاہدوں کی پاسداری نہیں کی گئی۔