چراٹ اور پبی میں پاکستان، روس اورعمان کی مشترکہ فوجی مشقیں شروع

پاکستان، روس اور عمان کی افواج کی مشترکہ فوجی مشقوں کا آغاز ہوگیا، مشقوں کا مقصد انسداد دہشت گردی کے شعبے میں عملی تجربات کا تبادلہ، جنگی مہارتوں میں بہتری اور دفاعی تعاون کو مزید مضبوط بنانا ہے،پاکستان اور روس کی مشترکہ فوجی مشق دروزبہ 9 کی نویں مشق کا آغاز آج چراٹ میں ہوگیا۔

مشق میں پاک فوج کے دستوں کے ساتھ روسی فوج کے دستے بھی شریک ہیں، جہاں دونوں ممالک کی افواج انسداد دہشت گردی کے حوالے سے مختلف تربیتی سرگرمیوں میں حصہ لیں گی۔

پاکستان، عمان مشترکہ مشق

اسی روز پاکستان اور عمان کی مشترکہ فوجی مشق وشاق الجبل 2، ماؤنٹین لنکس 2 کی دوسری مشق بھی نیشنل کاؤنٹر ٹیررازم سینٹر پبی میں شروع ہوگئی،اس مشق میں پاک فوج کے دستوں کے ساتھ عمان کی شاہی فوج کے دستے شریک ہیں۔

مشقیں دو ہفتے جاری رہیں گی

دونوں مشترکہ مشقیں دو ہفتوں تک جاری رہیں گی، جن کے دوران شریک افواج اپنے عملی اور آپریشنل تجربات ایک دوسرے سے شیئر کریں گی۔

انسداد دہشت گردی کی تربیت

مشقوں کے دوران انسداد دہشت گردی کی کارروائیوں سے متعلق مختلف مشقیں اور طریقہ کار بہتر بنانے پر توجہ دی جائے گی،شریک فوجی دستے مشترکہ تربیت کے ذریعے ایک دوسرے کے تجربات اور بہترین عملی طریقوں سے استفادہ کریں گے۔

جنگی مہارتوں میں بہتری

مشترکہ تربیتی سرگرمیوں کے ذریعے شریک افواج اپنی جنگی صلاحیتوں اور حربی مہارتوں کو مزید بہتر بنائیں گی،مشقوں کا مقصد مختلف حالات میں مشترکہ کارروائیوں کے دوران افواج کے درمیان باہمی تعاون اور ہم آہنگی کو مزید مؤثر بنانا بھی ہے۔

دفاعی تعاون کا فروغ

مشترکہ فوجی مشقوں کے ذریعے پاکستان، روس اور عمان کے درمیان دفاعی تعاون کو مزید مضبوط بنانے پر بھی توجہ دی جا رہی ہے،مشقوں میں عملی تجربات کے تبادلے اور مشترکہ تربیت سے شریک ممالک کی افواج کے درمیان باہمی پیشہ ورانہ روابط مزید مستحکم ہوں گے۔