پاکستان ویمن کرکٹ ٹیم کی کپتان فاطمہ ثنا کینیڈا سپر 60 لیگ کے دوسرے سیزن میں شرکت کے لیے کینیڈا پہنچ گئیں۔
فاطمہ ثنا لیگ میں وینکوور اینکرز کی نمائندگی کریں گی ، پاکستان ویمن ٹیم کی مصروفیات نہ ہونے کے باعث انہیں کینیڈا سپر 60 لیگ کے لیے این او سی جاری کیا گیا ہے۔
پاکستان ویمن کرکٹ ٹیم کی کپتان فاطمہ ثنا کو رواں سال ہونے والے کینیڈا سپر 60 کے لیے ’وینکوور اینکرز‘ نے اپنی ٹیم میں شامل کر کیا تھا۔
کینیڈین ٹی 10 لیگ کا دوسرا سیزن 29 ستمبر سے 4 اکتوبر تک کھیلا جائے گا جبکہ اس سے قبل بھی فاطمہ ثنا انگلش ویمنز لیگ دی ہنڈرڈ میں شرکت کر چکی ہیں۔
فاطمہ ثنا کے کیرئر پر ایک نظر
کراچی کی ٹیپ بال کرکٹ سے نکل کر قومی ٹیم کی کپتانی تک کا سفر فاطمہ ثنا نے بہت کم وقت میں طے کیا ہے ، آج وہ پاکستان کی خواتین کرکٹ کا سب سے نمایاں نام ہیں۔
2019 میں ایک ڈومیسٹک ٹی ٹوئنٹی چیمپئن شپ میں سات میچوں میں سات وکٹیں لے کر انہوں نے سلیکٹرز کی توجہ حاصل کی، اور دو ماہ بعد ہی مئی 2019 میں 17 سال کی عمر میں جنوبی افریقہ کے خلاف ون ڈے اور ٹی ٹوئنٹی ڈیبیو کر لیا۔
2020 میں پی سی بی ایمرجنگ کرکٹر آف دی ایئر بنیں، اور 2021 میں آئی سی سی ویمنز ایمرجنگ کرکٹر آف دی ایئر کا اعزاز جیتنے والی پہلی پاکستانی خاتون بن گئیں، اسی سال ویسٹ انڈیز کے خلاف 5/39 کی شاندار کارکردگی ان کے کیریئر کا اہم موڑ ثابت ہوئی۔ 2022 کے ورلڈ کپ اور کامن ویلتھ گیمز میں وہ پاکستان کی سب سے کامیاب بولر رہیں۔
اگست 2024 میں پی سی بی نے انہیں مستقل کپتان مقرر کیا اورکپتان بننے کے بعد ان کی کارکردگی میں نمایاں بہتری آئی۔ 2025 کے ورلڈ کپ کوالیفائر میں پاکستان ناقابلِ شکست رہا اور وہ ٹورنامنٹ کی بہترین ٹیم کی کپتان منتخب ہوئیں۔
2026 ٹی ٹوئنٹی ورلڈ کپ میں جنوبی افریقہ کے خلاف ناقابلِ شکست 55 رنز اور 16 رنز کے عوض 3 وکٹیں لے کر وہ پہلی کپتان بنیں جس نے ایک ہی ورلڈ کپ میچ میں نصف سنچری تین وکٹیں اپنے نام کیں۔
اس سال وہ ٹی ٹوئنٹی میں 540 رنز کے ساتھ کسی بھی پاکستانی بلے بازوں سے آگے ہیں، اور 31 وکٹوں کے ساتھ ٹیم کی سب سے کامیاب بولر بھی ہیں ، ایشیا کپ میں ان کی قیادت میں پاکستان پوڈیم تک پہنچا۔
اپنی بولنگ، جارحانہ بیٹنگ اور پُرسکون قیادت کی بدولت فاطمہ ثنا آج نہ صرف پاکستان بلکہ عالمی خواتین کرکٹ میں ایک معتبر نام بن چکی ہیں۔
By 
