پاکستان سعودی عرب دفاعی معاہدہ ،ملک بھر کی مساجد میں یوم تشکر،خصوصی دعائیں

  آج ملک بھر میں یوم تشکر و یوم دعا کا انعقاد کیا گیا جس کا مقصد پاکستان اور سعودی عرب کے درمیان حالیہ دفاعی اسٹریٹیجک معاہدے پر اللہ تعالیٰ کا شکر ادا کرنا اور دعا کے ذریعے اس معاہدے کی برکت طلب کرنا تھا۔

مرکزی چیئر مین حافظ محمد طاہر محمود اشرفی، علامہ عبدالحق مجاہد، مولانا نعمان حاشر اور دیگر مذہبی قائدین نے اس دن کی اہمیت پر روشنی ڈالتے ہوئے کہا کہ یہ موقع نہ صرف قومی خوشی اور فخر کا باعث ہے بلکہ اس میں ملکی و مذہبی ذمہ داریوں کو سمجھنے اور ان پر عمل کرنے کی دعوت بھی مضمر ہے۔

یہ خبر بھی پڑھیں :پاکستان کے ساتھ دفاعی معاہدے کا مشترکہ اعلامیہ سعودی سرکاری ویب سائٹ پر جاری

یوم تشکر و یوم دعا کے دوران ملک بھر کے علماء و مشائخ، آئمہ و خطباء نے نماز جمعہ کے بعد اجتماعات میں خصوصی دعائیں کیں کہ مسلمانوں کے مقدس مقامات کی حفاظت کی ذمہ داری کو بخوبی ادا کرنے کی توفیق عطا کرے  اور ملک کی قیادت کو حکمت، بصیرت اور کامیابی کے ساتھ اپنے فرائض سرانجام دینے کی قدرت دے۔

 علما  نے اس موقع پر کہا کہ ارض حرمین شریفین کی حفاظت کا فریضہ پاکستان کے لیے ایک عظیم اعزاز ہے اور یہ فخر کا باعث ہے کہ اللہ تعالیٰ نے مسلمانوں کے مقدس مقامات کی نگہداشت کے لیے پاکستان کو یہ ذمہ داری سونپی۔ انہوں نے مزید کہا کہ یہ معاہدہ قیادت کی دوراندیشی، حکمت عملی اور عسکری مہارت کے نتیجے میں ممکن ہوا جس پر ملک بھر کو شکر ادا کرنا چاہیے۔

شرکاء نے یوم تشکر و یوم دعا میں بھرپور شرکت کی اور ملک و ملت کی ترقی، قیادت کی کامیابی، دفاعی استحکام اور مقدس مقامات کی حفاظت کے لیے دعا کی۔ یہ دن پاکستان کے لیے نہ صرف ایک مذہبی موقع تھا بلکہ قومی یکجہتی اور مسلم امہ کے ساتھ تعلقات کو مستحکم کرنے کی علامت بھی قرار دیا گیا۔