حکومت نے اسلام آباد کے لیے نئی ہاؤسنگ سکیم کی منظوری دے دی

فیڈرل گورنمنٹ ایمپلائز ہاؤسنگ اتھارٹی (FGEHA) نے وزارت ہاؤسنگ اینڈ ورکس میں اپنے 43ویں ایگزیکٹو بورڈ کے اجلاس کے دوران مارگلہ آرچرڈ پارک روڈ ہاؤسنگ اسکیم کی ترقی کی باضابطہ منظوری دے دی ہے۔

وزارت ہاؤسنگ اور ورکس کے مطابق فیڈرل گورنمنٹ ایمپلائز ہاؤسنگ اتھارٹی کی بورڈ میٹگ میں اس منصوبے کے لیے سہ فریقی ترقیاتی معاہدے کی منظوری دی گئی۔ یہ اسکیم ڈیفنس ہاؤسنگ اتھارٹی (DHA) اور سپریم کورٹ بار ایسوسی ایشن کے اشتراک سے تیار کی جائے گی۔

تینوں اداروں کے درمیان معاہدے پر دستخط کی رسمی تقریب 26 ستمبر کو شیڈول ہے۔ حکام نے تصدیق کی کہ اس معاہدے کی وزارت قانون نے پہلے ہی جانچ اور منظوری دے دی ہے۔ دستخط کے بعد ترقیاتی کام تیز رفتاری سے شروع ہو جائیں گے تاکہ بروقت تکمیل کو یقینی بنایا جا سکے۔

اس منصوبے کا مقصد الاٹیز کو ایک جدید، عالمی معیار کی رہائشی کمیونٹی فراہم کرنا ہے۔ اس منصوبے میں تجارتی علاقوں، پارکس، تعلیمی اداروں، مساجد اور دیگر ضروری عوامی سہولیات کے لیے مختص جگہیں شامل ہیں۔

ڈائریکٹر جنرل ایف جی ای ایچ اے کیپٹن (ر) ظفر اقبال نے تمام الاٹیز کو مبارکباد دی اور انہیں یقین دلایا کہ جن وفاقی ملازمین کو پہلے ہی پلاٹ الاٹ ہو چکے ہیں ان کے حقوق کا مکمل تحفظ کیا جائے گا۔ انہوں نے اس بات پر زور دیا کہ شفافیت، کارکردگی اور خدمات کی فراہمی اتھارٹی کی اولین ترجیحات میں شامل رہے گی۔