قومی ایئر لائن کی پانچ سال بعد برطانیہ کے لیے پروازیں بحال

قومی ایئر لائن کی برطانیہ کے لیے پروازیں بحال، پانچ سال بعد اسلام آباد سے مانچسٹر کے لیے پہلی پرواز آج روانہ ہوگی۔

پی آئی اے کا بوئنگ 777 ساختہ طیارہ برطانوی فلائٹ آپریشن کو سرانجام دے گا، اسلام آباد ایئر پورٹ پر افتتاحی تقریب میں وزیر دفاع خواجہ آصف ،یورپی یونین ،برطانیہ کے سفیروں سمیت حکومت کے اعلی حکام شریک ہوں گے۔

 اس حوالے سے ہائی کمشنر محمد فیصل کا کہنا ہے کہ برطانیہ کے مزید شہروں کے لیے پروازوں کا آغاز بھی متوقع ہے۔

ترجمان  پی آئی اے کے مطابق فلائٹ آپریشن کے آغاز کے ساتھ ہی مسافروں کی جانب سے قومی ایئر لائن پر بھرپور اعتماد کا اظہار دیکھنے میں آیا اور اگلے تین ماہ کی ایڈوانس بکنگ کر لی گئی ہے، ترجمان کے مطابق ساڑھے 12 ہزار مسافروں نے ایڈوانس بکنگ کروا لی جس کے پیش نظر مستقبل میں فلائٹ آپریشن کو مزید وسعت دی جائےگی ۔

ترجمان  کے مطابق پہلے مرحلے میں اسلام آباد سے مانچسٹر کے لیے دو پروازیں ہفتہ وار چلائی جائیں گی، دوسرے مرحلے میں لاہور اور کراچی سے بھی پروازوں کا آغاز کیا جائےگا۔ترجمان کے مطابق بوئنگ 777جہاز ساڑھے تین سو مسافروں کو لیکر برطانیہ روانہ ہوگا۔

یہ خبر بھی پڑھیں :پی آئی اے کے ریٹائرڈ ملازمین کے لیے بڑی خبر آگئی

اسلام آباد ایئر پورٹ ، دوران پرواز اور مانچسٹر ایئرپورٹ پر کیک کٹنگ تقاریب ہونگی ،  افتتاحی تقریب میں قرعہ اندازی کے ذریعے مسافروں کوانعامات دینے کا فیصلہ کیا گیا ہے جبکہ مسافروں کے لیے  قرعہ اندازی میں موبائل اور لکی ڈرا میں 1300سی سی گاڑی شامل ہیں۔

ترجمان کے مطابق افتتاحی پرواز کی مناسبت سے پی آئی اے انتظامیہ نے مسافروں کی پر تکلف میزبانی کا فیصلہ کرتے ہوئے خصوصی مینیو بھی رکھا ہے۔

واضح رہے کہ 24جون 2020 کو غلام سرور خان نے پائلٹ کی ڈگریوں سے متعلق قومی اسمبلی کے فورم پر بیان دیا تھا، جس پر یکم جولائی 2020 کو برطانیہ نے پی آئی اے پر پابندی عائد کردی تھی۔