گھی اور کوکنگ آئل کی قیمتوں سے متعلق اہم خبر

لاہور شہر میں گھی اور کوکنگ آئل کی قیمتوں میں استحکام پیدا ہو گیا ہے۔ مارکیٹ ذرائع کے مطابق رواں ہفتے کے دوران گھی اور آئل کی قیمتوں میں کوئی نمایاں تبدیلی نہیں دیکھی گئی۔

ذرائع کے مطابق اس ہفتے گھی کی کم سے کم قیمت فی کلو 420 روپے جبکہ زیادہ سے زیادہ قیمت 520 روپے فی کلو ریکارڈ کی گئی۔ اسی طرح کوکنگ آئل کی کم قیمت فی کلو 550 روپے اور زیادہ سے زیادہ قیمت 590 روپے فی کلو رہی۔ رپورٹ کے مطابق گزشتہ ایک ماہ کے دوران ان دونوں اشیاء کی قیمتوں میں اوسطاً 4 سے 5 روپے فی کلو کا اضافہ ہوا، تاہم حالیہ دنوں میں ان قیمتوں میں مزید کوئی اضافہ یا کمی نہیں ہوئی۔

تاجروں اور دکانداروں نے بتایا کہ بین الاقوامی مارکیٹ میں پام آئل کی قیمتوں میں معمولی اتار چڑھاؤ ضرور دیکھا گیا، مگر مقامی مارکیٹ میں گھی اور کوکنگ آئل کی قیمتیں مستحکم رہی ہیں۔ ان کے مطابق ڈالر کی قدر میں استحکام اور حکومتی اقدامات کے باعث درآمدی لاگت میں کمی آئی ہے، جس سے مقامی سطح پر گھی اور آئل کی قیمتوں میں دباؤ کم ہوا ہے۔

یہ بھی پڑھیں: مہنگائی بے قابو ! گھی اور آٹے کی قیمتوں میں اضافہ

دوسری جانب لاہور کے شہریوں کا کہنا ہے کہ اگرچہ قیمتوں میں استحکام ایک مثبت اشارہ ہے، تاہم اب بھی گھی اور کوکنگ آئل عام صارفین کی پہنچ سے باہر ہیں۔ شہریوں کے مطابق چند ماہ قبل یہی اشیاء نسبتاً کم قیمت پر دستیاب تھیں، لیکن عالمی منڈی میں خام تیل کی قیمتوں میں اضافے اور ٹرانسپورٹ کے بڑھتے اخراجات نے گھی اور آئل کی قیمتوں کو اوپر پہنچا دیا۔

شہریوں نے کہا کہ اشیائے خوردونوش کی مسلسل مہنگائی نے گھریلو بجٹ کو متاثر کیا ہے، اور اگرچہ قیمتوں میں اضافہ رک گیا ہے، لیکن اب بھی عام آدمی کے لیے یہ بنیادی ضروریات خریدنا مشکل ہے۔