ستمبر 2025 میں پاکستان کی موبائل مینوفیکچرنگ انڈسٹری میں نمایاں اضافہ ریکارڈ کیا گیا ہے۔ اس مہینے کے دوران مقامی سطح پر موبائل فونز کی تیاری اور اسمبلنگ کے عمل میں 55 فیصد تک اضافہ ہوا، جو ملک میں موبائل فون کی صنعت کے لیے ایک اہم سنگ میل قرار دیا جا رہا ہے۔
پاکستان ٹیلی کمیونیکیشن اتھارٹی (پی ٹی اے) کے مطابق ستمبر میں مجموعی طور پر 30 لاکھ سے زائد موبائل فونز مقامی سطح پر تیار کیے گئے، جو کہ رواں سال کے دوران سب سے زیادہ پیداوار ہے۔ رپورٹ کے مطابق اس میں سالانہ بنیاد پر 40 فیصد اور ماہانہ بنیاد پر 55 فیصد کا اضافہ دیکھا گیا۔ پی ٹی اے کا کہنا ہے کہ یہ اضافہ مقامی مینوفیکچرنگ سیکٹر کی ترقی اور ملکی معیشت میں بہتری کا مظہر ہے۔
اعداد و شمار کے مطابق مالی سال 2025 کے ابتدائی نو مہینوں میں مقامی طور پر تیار کیے گئے موبائل فونز کی مجموعی فروخت 2 کروڑ 22 لاکھ یونٹس تک پہنچ گئی۔ پی ٹی اے نے بتایا کہ پاکستان میں موبائل فونز کی مجموعی فروخت میں مسلسل اضافہ ہو رہا ہے، جس میں 1 کروڑ 2 جی فونز اور 1 کروڑ 10 لاکھ اسمارٹ فونز شامل ہیں۔ رپورٹ کے مطابق ملک میں موبائل فونز کی مجموعی فروخت میں ایک فیصد کا اضافہ ریکارڈ کیا گیا۔
مزید بتایا گیا کہ 2 جی فونز کی فروخت کا حصہ 48 فیصد جبکہ اسمارٹ فونز کی فروخت کا حصہ 52 فیصد رہا۔ یہ اعداد و شمار ظاہر کرتے ہیں کہ صارفین میں جدید ٹیکنالوجی کے حامل فونز کی مانگ میں مسلسل اضافہ ہو رہا ہے۔
پی ٹی اے کے مطابق پاکستان اب اپنی مقامی موبائل مینوفیکچرنگ کے ذریعے 94 فیصد ملکی طلب کو پورا کر رہا ہے۔ یہ پیش رفت اس بات کا ثبوت ہے کہ ملک میں تیار کیے جانے والے فونز نہ صرف معیار کے لحاظ سے بہتر ہو رہے ہیں بلکہ مقدار میں بھی اضافہ دیکھنے میں آ رہا ہے۔
رپورٹ میں مزید کہا گیا ہے کہ اگلے سال کے دوران موبائل فونز کی فروخت میں 7 سے 8 فیصد اضافے کی توقع ہے، جو ملکی معیشت اور ٹیکنالوجی کے شعبے کے لیے ایک مثبت اشارہ ہے۔
By 
