ملک بھر میں نئے گیس کنکشنز کے حصول کے لیے شہریوں کی جانب سے غیر معمولی دلچسپی دیکھی گئی ہے۔ سوئی ناردرن گیس کمپنی کو نئے کنکشنز کے لیے چار لاکھ سے زائد درخواستیں موصول ہو چکی ہیں، تاہم نئے کنکشنز لگانے سے متعلق حتمی فیصلہ ابھی تک نہیں کیا گیا۔
تفصیلات کے مطابق سوئی ناردرن گیس کمپنی کے نظام پر نئے کنکشنز کھلتے ہی ارجنٹ بنیادوں پر درخواستیں جمع کرانے والوں کا تانتا بندھ گیا، جس کے نتیجے میں کمپنی کا سسٹم شدید دباؤ کا شکار ہے۔ حکام کے مطابق سسٹم پر بوجھ بڑھنے کے باعث درخواستوں کی جانچ اور پراسیسنگ میں مشکلات پیش آ رہی ہیں۔
ذرائع کے مطابق صرف لاہور ریجن میں چند ہی دنوں کے دوران چار لاکھ سے زائد آر ایل این جی (RLNG) کنکشنز کے لیے درخواستیں موصول ہو چکی ہیں۔ درخواستوں کی اس غیر معمولی تعداد نے کمپنی کے انتظامی ڈھانچے پر واضح دباؤ ڈال دیا ہے، اور موجودہ صورتحال میں سروے کے لیے تعینات عملے کی شدید کمی کا سامنا ہے۔
ذرائع کا مزید کہنا ہے کہ اگرچہ عوام کی جانب سے کنکشنز کے لیے بے حد رجحان دیکھا جا رہا ہے، لیکن نئے کنکشنز کے اجراء سے متعلق حتمی فیصلہ ابھی نہیں کیا گیا۔ حکام اس بات کا جائزہ لے رہے ہیں کہ موجودہ گیس سپلائی اور سسٹم کی گنجائش کو مدنظر رکھتے ہوئے کتنی نئی درخواستیں منظور کی جا سکتی ہیں۔
سوئی ناردرن گیس کمپنی کے حکام کے مطابق فی الحال صرف سروے کا عمل شروع کیا جا رہا ہے۔ اس مرحلے میں درخواست گزاروں کی جانب سے فراہم کردہ معلومات اور مقامات کی جانچ پڑتال کی جائے گی۔ حکام کا کہنا ہے کہ سروے مکمل ہونے کے بعد ہی اگلے مرحلے میں کنکشنز کی منظوری اور تنصیب سے متعلق فیصلہ کیا جائے گا۔
حکام کے مطابق اس عمل کا مقصد شفافیت کو یقینی بنانا اور کمپنی کے نظام پر غیر ضروری بوجھ سے گریز کرنا ہے، تاکہ مستقبل میں گیس فراہمی کے عمل کو موثر اور منظم انداز میں چلایا جا سکے۔
By 
