خیبر پختونخوا میں تین روزہ تعطیلات کا اعلان

خیبر پختونخوا کے ضلع مانسہرہ میں تین روزہ تعطیلات کا اعلان کر دیا گیا ہے جس کے باعث تمام سرکاری اور نجی اسکول بند رہیں گے۔ ضلعی انتظامیہ نے حلقہ NA-18 میں ضمنی انتخاب کے سلسلے میں 22، 23 اور 24 نومبر کو مقامی تعطیلات دینے کا اعلان کیا ہے۔

نوٹیفکیشن کے مطابق انتخابی سرگرمیوں کے دوران کسی ناخوشگوار صورتحال سے بچنے اور امن و امان برقرار رکھنے کے لیے اسکول بند رکھنے کا فیصلہ کیا گیا ہے، جبکہ اس حلقے میں ضمنی انتخاب 23 نومبر 2025 کو ہوگا۔

ملک بھر میں امتحانات اور سردیوں کی چھٹیوں کے سیزن کے آغاز کے ساتھ ہی اسکولوں میں سرگرمیاں بڑھ گئی ہیں۔ بلوچستان کے سرد علاقوں میں سرکاری اسکول 16 دسمبر سے ڈھائی ماہ کے لیے بند رہیں گے، جس کے باعث طلبہ کو طویل سردیوں کی تعطیلات میسر آئیں گی۔ چمن میں جماعت اول سے ساتویں تک امتحانات 16 سے 24 نومبر تک جاری ہیں، جبکہ جماعت ہشتم کے بورڈ امتحانات 24 نومبر سے شروع ہوں گے۔

یہ بھی پڑھیں: بھارت کا غرور خاک میں مل گیا، پاکستانی فضائی حدود کی بندش سے ایئر انڈیا مالی بحران کا شکار

پنجاب میں موسمِ سرما کی تعطیلات 23 دسمبر 2025 سے 11 جنوری 2026 تک مقرر کی گئی ہیں اور اسکول 13 جنوری 2026 کو دوبارہ کھلیں گے۔ دوسری جانب صوبے میں اسموگ کے باعث اسکول جلد بند کرنے کی افواہیں زیر گردش تھیں، تاہم صوبائی حکام نے وضاحت کی ہے کہ اس حوالے سے ابھی کوئی فیصلہ نہیں کیا گیا۔

ضلع مانسہرہ میں انتخابی سرگرمیوں اور ملک کے مختلف حصوں میں سردیوں کی تعطیلات کے باعث تعلیمی شیڈول میں بڑی تبدیلیاں رونما ہو رہی ہیں، جبکہ امتحانات کے قریب ہوتے ہی اسکول انتظامیہ اور طلبہ دونوں اپنی تیاریوں میں مصروف ہیں۔