ملک میں بے روزگاری میں اضافے سے متعلق تشویشناک اعدادوشمار سامنے آ گئے

ادارہ شماریات کی جانب سے لیبرفورس سروے 2024-25 جاری کردیا گیا، پاکستان میں بےروزگاری کی شرح 7.1 فیصد ہوگئی ہے۔

تفصیلات کے مطابق ادارہ شماریات کی لیبر فورس سروے میں بتایا گیا ہے کہ پاکستان میں 5 سال میں بےروزگاری 0.8 فیصد بڑھ گئی، پاکستان میں بے روزگار افراد کی تعداد 80 لاکھ تک پہنچ چکی ہے، ملک میں اوسط ماہانہ اجرت 39 ہزار 42 روپے ہوگئی۔

ادارہ شماریات کی رپورٹ میں بتایا گیا ہے کہ پاکستان کی آبادی 24 کروڑ 14 لاکھ ہوگئی جبکہ لیبر فورس کا حجم بڑھ کر 7 کروڑ 72 لاکھ ہو گیا۔

لیبر فورس سروے میں کہا گیا کہ ورکنگ ایج آبادی 43 فیصد، غیر فعال آبادی 53.8 فیصدتک پہنچ گئی ہے، ملک کی مجموعی طور پر3.3 فیصد آبادی بے روزگار ہے۔

مزید پڑھیں: پنجاب میں بے روزگاری کی شرح میں خطرناک حد تک اضافہ, سرکاری نوکری خواب بن گئی

لیبر فورس سروے میں روزگار کی فراہمی میں خدماتی شعبے کو سرفہرست قرار دیا گیا ہے، سروسز سیکٹر میں 3 کروڑ 18 لاکھ افراد برسرِ روزگار ہیں جبکہ زرعی شعبے میں روزگار کی شرح 33.1 فیصد اور صنعتی شعبے میں 25.7 فیصد ہے۔

ادارہ شماریات نے بتایا کہ زراعت میں 2 کروڑ 55 لاکھ، صنعت میں 1 کروڑ 98 لاکھ افراد کو روزگار حاصل ہے، 5 سال میں اوسط اجرت میں 15 ہزار 14 روپے اضافہ ہوا۔

سروے میں بتایا گیا کہ 2020-21 میں اوسط اجرت 24 ہزار28 روپےتھی، مردوں کی اوسط ماہانہ اجرت 39 ہزار 302 جبکہ خواتین کی اوسط ماہانہ اجرت 37 ہزار 347 روپے ہے۔