تاریخی اضافے کے بعد آج سونے کی فی تولہ قیمت میں نمایاں کمی

عالمی اور مقامی مارکیٹوں میں آج سونے اور چاندی کی قیمتوں میں کمی ریکارڈ کی گئی۔

 بین الاقوامی بلین مارکیٹ میں سونے کی قیمت میں 20 ڈالر فی اونس کی کمی دیکھی گئی، جس کے بعد سونے کی عالمی قیمت 4 ہزار 299 ڈالر فی اونس کی سطح پر آ گئی۔

عالمی مارکیٹ میں قیمتوں میں کمی کے اثرات مقامی صرافہ بازاروں میں بھی واضح طور پر نظر آئے،  مقامی مارکیٹ میں ہفتے کے روز 24 قیراط خالص سونے کی فی تولہ قیمت میں 2 ہزار روپے کی کمی واقع ہوئی، جس کے بعد نئی قیمت 4 لاکھ 52 ہزار 262 روپے پر آ گئی۔

اسی طرح 10 گرام سونے کی قیمت بھی 1 ہزار 715 روپے کم ہو کر 3 لاکھ 87 ہزار 741 روپے کی سطح پر پہنچ گئی۔

یہ بھی پڑھیں :سونے کی قیمتوں میں بڑا اضافہ، فی تولہ کتنے کا ہو گیا؟

مارکیٹ ذرائع کے مطابق سونے کی قیمتوں میں کمی کی بنیادی وجہ عالمی سطح پر سرمایہ کاروں کا محتاط رویہ، امریکی ڈالر کی قدر میں اتار چڑھاؤ اور بین الاقوامی معاشی اشاریوں میں تبدیلی ہے۔

  ماہرین کا کہنا ہے کہ عالمی مالیاتی صورتحال اور مرکزی بینکوں کی پالیسیوں کے باعث سونے کی قیمتوں میں آئندہ دنوں مزید اتار چڑھاؤ دیکھنے میں آ سکتا ہے۔

دوسری جانب چاندی کی قیمتوں میں بھی نمایاں کمی ریکارڈ کی گئی۔ مقامی مارکیٹ میں فی تولہ چاندی کی قیمت 220 روپے کی کمی کے بعد 6 ہزار 464 روپے ہو گئی، جبکہ 10 گرام چاندی کی قیمت 189 روپے کم ہو کر 5 ہزار 541 روپے کی سطح پر آ گئی۔

صرافہ بازاروں سے وابستہ تاجروں کا کہنا ہے کہ قیمتوں میں کمی کے باعث خریداروں کی دلچسپی میں معمولی اضافہ دیکھا جا رہا ہے، تاہم مجموعی طور پر کاروبار کا حجم اب بھی محتاط رجحان کا مظہر ہے، ماہرین کے مطابق آنے والے دنوں میں عالمی مارکیٹ کے رجحانات مقامی قیمتوں کے تعین میں اہم کردار ادا کرتے رہیں گے۔