پاکستان کے خلاف آئندہ سیریز سے قبل آسٹریلوی ٹیم کو اہم کھلاڑیوں کی دستیابی کے حوالے سے غیر یقینی صورتحال کا سامنا ہے۔ آسٹریلیا کے چیئرمین آف سلیکٹرز جارج بیلے نے اگرچہ چند کھلاڑیوں کی فٹنس پر امید ظاہر کی ہے، تاہم دورہ پاکستان کے لیے مکمل اسکواڈ کی حتمی دستیابی پر شکوک بدستور موجود ہیں۔
تفصیلات کے مطابق چیئرمین آف سلیکٹرز جارج بیلے کا کہنا ہے کہ فاسٹ بولر جوش ہیزل ووڈ اور مڈل آرڈر بلے باز ٹِم ڈیوڈ کے ٹی 20 ورلڈ کپ تک فٹ ہو جانے کی امید ہے۔ ان کے مطابق دونوں کھلاڑیوں کی انجریز پر طبی عملہ مسلسل نظر رکھے ہوئے ہے اور بحالی کا عمل مثبت سمت میں آگے بڑھ رہا ہے۔
تاہم جارج بیلے نے اس بات کا بھی اعتراف کیا ہے کہ پاکستان کے دورے میں پیٹ کمنس اور جوش ہیزل ووڈ کی شرکت یقینی نہیں ہے۔ ذرائع کے مطابق آسٹریلوی ٹیم منیجمنٹ فروری میں شروع ہونے والے ٹی 20 ورلڈ کپ کو مدنظر رکھتے ہوئے کسی بھی قسم کا بڑا رسک لینے کے موڈ میں نہیں۔
میڈیا رپورٹس کے مطابق پیٹ کمنس کی دستیابی کے حوالے سے آسٹریلیا محتاط حکمت عملی اختیار کرنا چاہتا ہے تاکہ اہم ایونٹ سے قبل کسی ممکنہ انجری سے بچا جا سکے۔ اسی تناظر میں یہ بھی امکان ظاہر کیا جا رہا ہے کہ چند سینئر کھلاڑیوں کو پاکستان کے خلاف سیریز میں آرام دیا جا سکتا ہے۔
آسٹریلوی حکام نے ماضی کی مثال دیتے ہوئے یاد دلایا کہ 2023 کے 50 اوورز فارمیٹ کے ورلڈ کپ میں ٹریوس ہیڈ کو انجری کے باوجود اسکواڈ کا حصہ رکھا گیا تھا اور بعد کے میچز میں وہ ٹیم کے لیے نہایت مؤثر ثابت ہوئے تھے۔ اسی ماڈل کو سامنے رکھتے ہوئے موجودہ فیصلے کیے جا رہے ہیں۔
واضح رہے کہ اگر پیٹ کمنس اور جوش ہیزل ووڈ پاکستان کے خلاف سیریز سے باہر رہتے ہیں تو آسٹریلوی بولنگ لائن اپ نسبتاً کم تجربہ کار ہو سکتی ہے، جس سے پاکستان کو ہوم کنڈیشنز میں فائدہ حاصل ہو سکتا ہے۔
یہ بھی واضح رہے کہ پاکستان اور آسٹریلیا کے درمیان متوقع سیریز کو شائقین کرکٹ کی جانب سے بے حد اہم قرار دیا جا رہا ہے، تاہم آسٹریلوی کھلاڑیوں کی دستیابی سے متعلق صورتحال نے اس سیریز کی تیاریوں کو مزید دلچسپ بنا دیا ہے۔
By 
