باہربیٹھے نام نہاد پاکستانی، طالبان سے محبت بھرے مذاکرات کے حامی وطن عزیزکی ترقی اور امن کے دشمن ہیں،خواجہ آصف

وزیرِ دفاع خواجہ آصف نے کہا ہے کہ باہربیٹھے نام نہاد پاکستانی، طالبان سے محبت بھرے مذاکرات کے حامی وطنِ عزیز کی ترقی اور امن کے دشمن ہیں اور یہی عناصر پاکستان کو معاشی استحکام اور محفوظ مستقبل سے محروم رکھنا چاہتے ہیں۔

وزیر دفاع کا کہنا تھا کہ یہی سوچ رکھنے والے لوگ بانی پی ٹی آئی کو دوبارہ اقتدار میں لانے کے خواہاں ہیں تاکہ اس مملکتِ خداداد کو اپنے تابع کیا جا سکے۔
سوشل میڈیا پر جاری اپنے بیان میں خواجہ آصف نے کہا کہ جو لوگ بیرونِ ملک بیٹھ کر پاکستان کو گالیاں دیتے ہیں اور دشمن بیانیے کو تقویت دیتے ہیں، وہی چاہتے ہیں کہ ایک مخصوص سیاسی کردار دوبارہ اقتدار میں آئے۔

انہوں نے کہا کہ 9 مئی کو فوجی تنصیبات پر حملے بھی انہی مذموم مقاصد کے حصول کی ایک کوشش تھےجن کا مقصد ریاستی اداروں کو کمزور کرنا تھا۔
وزیر دفاع نے کہا کہ بانی پی ٹی آئی کے دورِ حکومت میں بھارت نے پاکستان پر حملہ کیا، مگر اس وقت قومی وقار کے بجائے کمزوری کا مظاہرہ کیا گیا اور بھارتی پائلٹ ابھی نندن کو راتوں رات ہاتھ جوڑ کر واپس کیا گیا۔

اس کے برعکس مئی 2025 میں جب بھارت نے دوبارہ جارحیت کی کوشش کی تو پاکستان نے بھرپور جواب دے کر فتح کی نئی تاریخ رقم کی جس پر پوری دنیا حیران رہ گئی۔خواجہ آصف نے کہا کہ اُس وقت پارلیمنٹ کو یہ بتایا گیا تھا کہ بھارت کے ساتھ جنگ کا رسک نہیں لیا جا سکتا مگر حالیہ مثال نے ثابت کر دیا کہ جب قوم اور افواج ایک پیج پر ہوں تو دشمن کو منہ توڑ جواب دیا جا سکتا ہے۔

عمران خان کی سیاسی پرورش کرنے اور اسکو اقتدار میں لانے والے اور آج پاکستان کو گالیاں نکالنے والوں کو پناہ مہیا کرنے والے سب چاہئیں گے یہ مملکت خداداد انکی تابع ھو جائے دوبارہ انکا پالتو بر سر اقتدار آۓ۔ یاد رکھیں 9مئی کو فوجی تنصیبات پہ حملہ انہی مقا صد کے حصول کی کوشش تھی۔ فرق… pic.twitter.com/ZlipGVe9Kr

— Khawaja M. Asif (@KhawajaMAsif) January 15, 2026

وزیر دفاع نے خبردار کیا کہ دشمن آج بھی تاک میں ہے اس لیے قوم کو ہوشیار اور بیدار رہنے کی ضرورت ہے، ان کا کہنا تھا کہ ملک دشمن بیانیہ پھیلانے والے عناصر، چاہے وہ اندر ہوں یا باہر، پاکستان کے روشن مستقبل کے راستے میں سب سے بڑی رکاوٹ ہیں اور قوم کو انہیں پہچان کر مسترد کرنا ہوگا۔