شناختی کارڈ مفت بنے گا، نادرا کا بڑا اعلان

نیشنل ڈیٹا بیس اینڈ رجسٹریشن اتھارٹی (نادرا) نے اعلان کیا ہے کہ پہلی بار کمپیوٹرائزڈ نیشنل شناختی کارڈ (CNIC) بنوانے والے پاکستانی شہری اب اس کارڈ کے لیے فیس ادا نہیں کریں گے۔

نادرا کے مطابق یہ سہولت 18 سال یا اس سے زائد عمر کے پاکستانی شہریوں کے لیے دستیاب ہے، جو پہلی بار غیر سمارٹ چپ CNIC بنوا رہے ہیں۔ شہری نادرا کے کسی بھی سینٹر پر جا کر 15 دن کے اندر اپنا کارڈ مفت حاصل کر سکتے ہیں۔

نادرا نے واضح کیا ہے کہ پہلی بار CNIC کے لیے کوئی فیس نہیں لی جائے گی۔ تاہم، اگر شہری اپنی CNIC جلدی چاہتے ہیں تو وہ اختیاری طور پر فوری سروسز استعمال کر سکتے ہیں۔

نادرا کے مطابق ارجنٹ سروس کے تحت 12 دن میں کارڈ کی ڈیلیوری ہوگی، جس کی فیس 1,150 روپے مقرر کی گئی ہے، جبکہ ایگزیکٹو سروس کے تحت 6 دن میں کارڈ کی ڈیلیوری ہوگی اور اس کی فیس 2,150 روپے ہوگی۔

نادرا نے Pak ID موبائل ایپ میں اپائنٹمنٹ بکنگ کی سہولت بھی متعارف کرائی ہے۔ شہری ایپ کے ذریعے اپنے قریب ترین نادرا سینٹر کے لیے وقت منتخب کر کے ملاقات طے کر سکتے ہیں۔ نادرا نے شہریوں کو مشورہ دیا ہے کہ وہ مقررہ وقت سے کم از کم 10 منٹ پہلے سینٹر پہنچیں تاکہ ان کی پروسیسنگ ترجیحی بنیاد پر ہو سکے۔

یہ بھی پڑھیں: نادرا فیملی رجسٹریشن سرٹیفکیٹ کیسے حاصل کیا جائے ؟شرائط کیا ہیں ؟

نادرا نے متحدہ عرب امارات میں مقیم پاکستانیوں کے لیے بھی موبائل رجسٹریشن کی سہولت فراہم کی ہے تاکہ وہ آسانی سے CNIC حاصل کر سکیں۔

نادرا کے مطابق یہ اقدام شناختی سہولتوں کو آسان اور تیز تر بنانے کے لیے اٹھایا گیا ہے، جس سے شہریوں کو کم وقت میں اور بغیر اضافی فیس کے کارڈ حاصل کرنے کی سہولت میسر ہوگی۔