پنجاب ایجوکیشن، کریکولم، ٹریننگ اینڈ اسیسمنٹ اتھارٹی نے جماعت ہشتم کے سالانہ امتحانات 2026 کے لیے باضابطہ ڈیٹ شیٹ جاری کر دی ہے۔
اتھارٹی کے مطابق امتحانات 4 روزہ شیڈول کے تحت 9 مارچ 2026 سے شروع ہو کر 12 مارچ 2026 تک جاری رہیں گے، اور تمام پرچے صبح 9 بجے سے دوپہر 12 بجے تک لیے جائیں گے۔
امتحانات کا آغاز پیر 9 مارچ کو ریاضی کے پرچے سے ہوگا، منگل 10 مارچ کو اُردو، بدھ 11 مارچ کو انگریزی اور جمعرات 12 مارچ کو سائنس کا پرچہ لیا جائے گا۔
اتھارٹی نے واضح کیا کہ جماعت ہشتم کے دیگر مضامین کے پرچے اسکول بیسڈ اسیسمنٹ ماڈل کے تحت متعلقہ اسکول خود منعقد کریں گے، جبکہ باقی مضامین اور دیگر جماعتوں کے سال کے اختتامی امتحانات 2026 کا شیڈول بعد میں جاری کیا جائے گا۔
امتحانی ہدایات کے مطابق طلبہ کو کیلکولیٹر، موبائل فون، اسمارٹ واچ یا کسی بھی قسم کے برقی آلات امتحانی مرکز میں لانے سے سختی سے منع کیا گیا ہے۔ امیدواروں کو ہدایت دی گئی ہے کہ وہ پرچہ شروع ہونے سے کم از کم 30 منٹ قبل امتحانی ہال پہنچیں اور داخلے کے لیے اپنا ب فارم اور رول نمبر سلپ ساتھ لائیں۔
طلبہ کو نیلے یا سیاہ بال پوائنٹ قلم اور کلپ بورڈ ساتھ لانے کی ہدایت کی گئی ہے، جبکہ ریاضی کے پرچے کے لیے جیومیٹری بکس لازمی ہوگی۔ مزید ہدایت کی گئی ہے کہ امیدوار معروضی اور تشریحی دونوں حصوں کے لیے صرف فراہم کردہ جوابی کاپی استعمال کریں اور اضافی صفحات فراہم نہیں کیے جائیں گے۔ پرچہ ختم ہونے سے قبل امتحانی ہال چھوڑنے کی اجازت نہیں ہوگی۔
واضح رہے کہ اس بار امتحانات کے سخت اور واضح ہدایات طلبہ کی تیاری اور شفافیت کو یقینی بنائیں گی، اور والدین کو چاہیے کہ وہ اپنے بچوں کی تیاری اور وقت پر امتحانی مرکز پہنچنے میں تعاون کریں۔
