بجلی صارفین کیلئےبڑی خوشخبری، فی یونٹ بڑی کمی کر دی گئی،نوٹفکیشن جاری

نیشنل الیکٹرک پاور ریگولیٹری اتھارٹی (نیپرا) نے ملک بھر کے صارفین کے لیے بجلی کی قیمت میں کمی کا نوٹیفکیشن جاری کر دیا ہے جس کے تحت بجلی 1 روپے 98 پیسے فی یونٹ سستی کر دی گئی ہے۔

نیپرا کے مطابق یہ کمی جنوری تا مارچ 2026 کی سہ ماہی ایڈجسٹمنٹ کی مد میں کی گئی ہے جس کا اطلاق جون سے اگست 2026 کے تین ماہ کے لیے ہوگا۔ فیصلے کے مطابق اس ریلیف سے ملک بھر کے بجلی صارفین کو مجموعی طور پر 67 ارب روپے سے زائد کا فائدہ پہنچے گا۔

نوٹیفکیشن میں واضح کیا گیا ہے کہ بجلی کی قیمت میں یہ کمی تمام صارفین پر لاگو ہوگی جس میں گھریلو، کمرشل اور صنعتی صارفین شامل ہیں۔ اسی طرح اس فیصلے کا اطلاق کراچی کے صارفین یعنی کے الیکٹرک کے صارفین پر بھی ہوگا۔

توانائی حکام کے مطابق سہ ماہی ایڈجسٹمنٹ کا مقصد پیداواری لاگت اور ایندھن کی قیمتوں میں تبدیلی کے اثرات کو صارفین تک منتقل کرنا ہوتا ہے تاکہ بجلی کے نرخوں میں شفافیت برقرار رکھی جا سکے۔

یہ بھی پڑھیں:تیل کی عالمی قیمتیں نیچے آ گئیں،عوام کو ریلیف ملنے کا امکان

ذرائع کے مطابق حالیہ کمی کے بعد عوام کو بجلی کے بلوں میں واضح ریلیف ملنے کی توقع ہے خاص طور پر گرمی کے موسم میں جب بجلی کی کھپت میں اضافہ ہو جاتا ہے۔

ماہرین کے مطابق بجلی کی قیمتوں میں کمی سے نہ صرف گھریلو صارفین کو ریلیف ملے گا بلکہ صنعتی شعبے کی پیداواری لاگت میں بھی کمی آئے گی جس کے معیشت پر مثبت اثرات مرتب ہو سکتے ہیں۔

نیپرا کے مطابق آئندہ سہ ماہی میں بجلی کی قیمتوں کا دوبارہ جائزہ لیا جائے گا اور اس کا انحصار فیول پرائس ایڈجسٹمنٹ اور پیداواری اخراجات پر ہوگا۔