پرتگال کے سپر اسٹار فٹبالر کرسٹیانو رونالڈو نے فیفا ورلڈ کپ 2026 میں ایک اور شاندار کارنامہ سرانجام دیتے ہوئے فٹبال کی تاریخ میں اپنا نام سنہری حروف سے رقم کر دیا۔ 41 سالہ رونالڈو دنیا کے پہلے کھلاڑی بن گئے ہیں جنہوں نے چھ مختلف فیفا ورلڈ کپ ایڈیشنز میں گول اسکور کرنے کا منفرد اعزاز حاصل کیا ہے۔
امریکا کے شہر ہوسٹن میں کھیلے گئے میچ میں پرتگال کا مقابلہ ازبکستان سے تھا۔ میچ کے آغاز سے ہی پرتگالی ٹیم نے جارحانہ کھیل کا مظاہرہ کیا اور صرف چھٹے منٹ میں رونالڈو نے جواؤ کینسلو کے شاندار کراس کو خوبصورت انداز میں جال کی راہ دکھا کر اپنی ٹیم کو برتری دلائی۔
اس گول کے ساتھ ہی رونالڈو نے ایک ایسا ریکارڈ قائم کیا جو اس سے قبل دنیا کا کوئی بھی فٹبالر حاصل نہیں کر سکا تھا۔ پرتگالی کپتان نے 2006، 2010، 2014، 2018، 2022 اور اب 2026 کے ورلڈ کپ میں بھی گول کر کے ثابت کر دیا کہ وہ دو دہائیوں سے زائد عرصے تک عالمی فٹبال کے اعلیٰ ترین معیار پر کھیلنے کی صلاحیت رکھتے ہیں۔
رونالڈو کی ورلڈ کپ کارکردگی پر نظر ڈالیں تو انہوں نے 2006، 2010 اور 2014 کے ایڈیشنز میں ایک، ایک گول اسکور کیا، جبکہ 2018 کے ورلڈ کپ میں چار گول کر کے اپنی ٹیم کی کامیابیوں میں اہم کردار ادا کیا۔ 2022 کے ورلڈ کپ میں بھی انہوں نے ایک گول کیا تھا اور اب 2026 میں ایک بار پھر تاریخ رقم کر دی ہے۔
اس تاریخی کامیابی کے بعد رونالڈو ورلڈ کپ کی تاریخ کے دوسرے معمر ترین گول اسکورر بھی بن گئے ہیں۔ اس فہرست میں پہلا نمبر کیمرون کے لیجنڈری فٹبالر راجر میلا کے پاس ہے جنہوں نے 1994 کے ورلڈ کپ میں 42 سال کی عمر میں گول اسکور کر کے یہ اعزاز حاصل کیا تھا۔
رونالڈو کا یہ کارنامہ نہ صرف ان کی غیر معمولی فٹنس، عزم اور محنت کا ثبوت ہے بلکہ یہ جدید فٹبال میں طویل عرصے تک اعلیٰ سطح پر کھیلنے کی ایک بے مثال مثال بھی ہے۔ 41 سال کی عمر میں بھی عالمی سطح پر شاندار کارکردگی کا مظاہرہ کرنا کسی بھی کھلاڑی کے لیے غیر معمولی کامیابی تصور کی جاتی ہے۔
By 
