By وفاقی حکومت نے پاک فوج میں اعلیٰ سطح پر اہم تقرری اور ترقی کا اعلان کرتے ہوئے لیفٹیننٹ جنرل عامر رضا کو فور اسٹار جنرل کے عہدے پر ترقی دے دی ہے۔ ترقی کے بعد انہیں کمانڈر نیشنل اسٹریٹجک کمانڈ مقرر کر دیا گیا ہے۔
سرکاری اعلامیے کے مطابق وزیراعظم کی منظوری کے بعد جنرل عامر رضا کو فور اسٹار جنرل کے عہدے پر ترقی دی گئی۔ وہ اس سے قبل چیف آف جنرل اسٹاف (CGS) کے طور پر خدمات انجام دے رہے تھے جہاں وہ فوجی آپریشنز، انٹیلی جنس، منصوبہ بندی اور عسکری امور کی نگرانی کے اہم فرائض سرانجام دے رہے تھے۔
ترقی کے بعد جنرل عامر رضا نیشنل اسٹریٹجک کمانڈ کی قیادت سنبھالیں گے جو پاکستان کے اسٹریٹجک اثاثوں سے متعلق امور میں اہم کردار ادا کرنے والا ادارہ تصور کیا جاتا ہے۔
یہ بھی پڑھیں:ٹرمپ نے سب کو چونکا دیا، سعودی عرب سے متعلق بڑا اعلان
وزیراعظم نے جنرل عامر رضا کو نئی ذمہ داریاں سنبھالنے پر مبارکباد دیتے ہوئے ان کے لیے نیک خواہشات کا اظہار کیا۔ وزیراعظم نے امید ظاہر کی کہ وہ اپنی پیشہ ورانہ صلاحیتوں وسیع تجربے اور قائدانہ کردار سے قومی دفاع کو مزید مضبوط بنانے میں اہم کردار ادا کریں گے۔
دفاعی حلقوں کے مطابق جنرل عامر رضا ایک تجربہ کار اور پیشہ ور فوجی افسر ہیں جنہوں نے اپنے کیریئر کے دوران مختلف اہم کمانڈ، اسٹاف اور آپریشنل عہدوں پر خدمات انجام دی ہیں۔ ان کی فور اسٹار جنرل کے عہدے پر ترقی اور نئی تعیناتی کو پاک فوج کی اعلیٰ قیادت میں ایک اہم پیش رفت قرار دیا جا رہا ہے۔
