ایک لاکھ روپے ماہانہ وظیفہ: حکومت کا انٹرن شپ پروگرام شروع

حکومتِ پنجاب نے صوبے کے نوجوان پیشہ ور افراد کو روزگار اور عملی تربیت کے بہترین مواقع فراہم کرنے کے لیے “پنجاب شرمپ انٹرن شپ پروگرام 2026-27” کا باقاعدہ اعلان کر دیا ہے۔ اس پروگرام کے تحت منتخب امیدواروں کو ایک سالہ عملی تربیت فراہم کی جائے گی، جبکہ دورانِ تربیت انہیں بھاری ماہانہ وظیفہ بھی دیا جائے گا۔

تفصیلات کے مطابق پنجاب حکومت کی جانب سے شروع کیے گئے اس انٹرن شپ پروگرام کا مقصد نوجوانوں کو جدید ایکوا کلچر کے شعبے میں عملی مہارتیں فراہم کرنا اور انہیں پیشہ ورانہ تجربے سے آراستہ کرنا ہے۔ پروگرام کے تحت منتخب ہونے والے ہر انٹرن کو تربیت کے دوران ایک لاکھ روپے ماہانہ وظیفہ دیا جائے گا۔

اعلان کے مطابق انٹرن شپ کی مدت ایک سال ہوگی۔ تمام منتخب انٹرنز کو علی والی، مظفر گڑھ میں قائم ’شرمپ اسٹیٹ‘ میں تعینات کیا جائے گا، جہاں وہ جھینگا فارمنگ کے مختلف شعبوں میں عملی تجربہ حاصل کریں گے اور جدید طریقہ کار سے آگاہی حاصل کریں گے۔

پنجاب حکومت اس پروگرام کے تحت مختلف تکنیکی اور پیشہ ورانہ شعبوں سے تعلق رکھنے والے مجموعی طور پر 100 نوجوانوں کا انتخاب کرے گی۔ منتخب امیدواروں کو بین الاقوامی معیار کے مطابق تربیت فراہم کی جائے گی تاکہ وہ جدید ایکوا کلچر کے شعبے میں مہارت حاصل کر سکیں۔

یہ بھی پڑھیں: ایزی پیسہ صارفین کے لیے زبردست خوشخبری، 50 فیصد تک ڈسکاؤنٹ کا اعلان

انٹرن شپ کے دوران نوجوانوں کو جھینگا فارمنگ، ہیچری آپریشنز، پروسیسنگ، فیڈ کی تیاری، لیبارٹری ورک اور مارکیٹنگ جیسے اہم اور جدید شعبوں میں عملی تربیت دی جائے گی۔ اس تربیتی پروگرام کا مقصد پنجاب کے ایکوا کلچر سیکٹر کو مزید مضبوط بنانا اور اس شعبے کے لیے تربیت یافتہ افرادی قوت تیار کرنا ہے۔

پنجاب حکومت کے مطابق اس پروگرام کے ذریعے نوجوانوں کو نہ صرف عملی تجربہ حاصل ہوگا بلکہ انہیں جدید تکنیکی مہارتیں بھی سیکھنے کا موقع ملے گا، جو مستقبل میں ان کی پیشہ ورانہ ترقی میں معاون ثابت ہوں گی۔

درخواست دینے کا طریقہ کار

حکومتِ پنجاب نے پروگرام میں دلچسپی رکھنے والے اہل امیدواروں کے لیے آن لائن درخواست دینے کا طریقہ کار بھی جاری کر دیا ہے۔ خواہش مند امیدوار پنجاب حکومت کے آفیشل جاب پورٹل jobs.punjab.gov.pk پر جا کر اپنی درخواست آن لائن جمع کرا سکتے ہیں۔

درخواست دینے کے لیے امیدوار پورٹل پر “Punjab Shrimp Internship Program” سرچ کریں اور متعلقہ کیٹیگری میں موجود فارم پُر کریں۔

مزید معلومات یا تفصیلات حاصل کرنے کے خواہش مند امیدوار پروجیکٹ ڈائریکٹر، شرمپ ایکوا کلچر کے دفتر سے بھی رابطہ کر سکتے ہیں۔