عالمی منڈی میں سونا سستا، قیمتیں پھر نیچے آ گئیں

عالمی مارکیٹ میں جمعرات کے روز سونے کی قیمتوں میں کمی ریکارڈ کی گئی بین الاقوامی مارکیٹ رپورٹس کے مطابق اسپاٹ گولڈ کی قیمت 0.4 فیصد کمی کے بعد 4,035.39 ڈالر فی اونس پر آ گئی جبکہ گزشتہ کاروباری سیشن میں سونے کی قیمت میں تقریباً 2 فیصد اضافہ دیکھا گیا تھا۔

دوسری جانب امریکی گولڈ فیوچر کی قیمت 0.3 فیصد اضافے کے ساتھ 4,045.70 ڈالر فی اونس ریکارڈ کی گئی جس سے ظاہر ہوتا ہے کہ سرمایہ کار مستقبل کی صورتحال کے حوالے سے محتاط رویہ اختیار کیے ہوئے ہیں۔

قیمتی دھاتوں کی دیگر عالمی قیمتوں میں بھی اتار چڑھاؤ دیکھا گیا۔ چاندی کی قیمت 0.6 فیصد کمی کے بعد 57.30 ڈالر فی اونس، پلاٹینم 1.1 فیصد کمی کے ساتھ 1,593.77 ڈالر فی اونس جبکہ پیلیڈیم 0.6 فیصد اضافے کے بعد 1,253.25 ڈالر فی اونس پر پہنچ گیا۔

یہ بھی پڑھیں:بجلی صارفین تیار رہیں، اگست کے بجلی بلوں میں بڑا جھٹکا متوقع

مالیاتی ماہرین کے مطابق امریکی 10 سالہ ٹریژری بانڈز کی ییلڈ میں اضافے نے سونے کی قیمتوں پر دباؤ بڑھایا ہے کیونکہ سونا ایسی سرمایہ کاری ہے جو کسی قسم کی ییلڈ یا منافع فراہم نہیں کرتی۔ جب بانڈز پر منافع بڑھتا ہے تو سرمایہ کار نسبتاً زیادہ منافع دینے والے اثاثوں کی طرف راغب ہوتے ہیں جس سے سونے کی طلب میں کمی آتی ہے۔

 اگر مارکیٹ کو یہ خدشہ ہو کہ مہنگائی کے دباؤ کے باعث مستقبل میں شرحِ سود بلند رہ سکتی ہے یا اس میں اضافہ ہو سکتا ہے تو بانڈز کی ییلڈ بھی بلند رہتی ہے اور یہی صورتحال سونے کی قیمتوں کو نیچے لانے کا سبب بنتی ہے۔

ادھر فیڈرل ریزرو نے رواں ہفتے اپنے حالیہ اجلاس میں شرحِ سود کو برقرار رکھنے کا فیصلہ کیا  تاہم چیئرمین کیون وارش نے اس بات کا اعادہ کیا کہ مہنگائی پر قابو پانا مرکزی بینک کی اولین ترجیح ہے۔ ان کے بیان کے بعد سرمایہ کار آئندہ مانیٹری پالیسی کے حوالے سے مزید محتاط ہو گئے ہیں۔

مارکیٹ کی نظریں اب امریکا کے جون کے پرسنل کنزمپشن ایکسپینڈیچر (PCE) افراطِ زر کے اعداد و شمار پر مرکوز ہیں کیونکہ یہ رپورٹ فیڈرل ریزرو کے آئندہ شرحِ سود کے فیصلوں میں اہم کردار ادا کر سکتی ہے۔

یہ بھی پڑھیں:ملک میں شدید بارشیں کب تک رہیں گی،محکمہ موسمیات کی نئی پیشگوئی آ گئی

دوسری جانب مشرقِ وسطیٰ میں جاری جغرافیائی و سیاسی کشیدگی بھی عالمی مالیاتی منڈیوں پر اثر انداز ہو رہی ہے جس کے باعث سرمایہ کار محفوظ سرمایہ کاری کے رجحانات اور عالمی معاشی اشاریوں پر گہری نظر رکھے ہوئے ہیں۔

ماہرین کا کہنا ہے کہ آنے والے دنوں میں امریکی معاشی اعداد و شمار، فیڈرل ریزرو کی آئندہ حکمت عملی اور عالمی سیاسی صورتحال سونے سمیت قیمتی دھاتوں کی قیمتوں کی سمت کا تعین کریں گے