اسٹیٹ بینک آف پاکستان نے ملکی زرمبادلہ ذخائر کے تازہ اعداد و شمار جاری کر دیے ہیں، جن کے مطابق جولائی کے آخری ہفتے کے دوران مجموعی ذخائر میں 3 کروڑ 25 لاکھ ڈالر کا اضافہ ریکارڈ کیا گیا ہے، اس اضافے کے بعد ملک کے مجموعی زرمبادلہ ذخائر 22 ارب 47 کروڑ ڈالر تک پہنچ گئے ہیں۔
اسٹیٹ بینک کے مطابق مرکزی بینک کے پاس موجود زرمبادلہ ذخائر میں 1 کروڑ 31 لاکھ ڈالر کا اضافہ ہوا، جس کے بعد یہ بڑھ کر 17 ارب 4 کروڑ ڈالر ہو گئےمرکزی بینک کے ذخائر میں اضافہ بیرونی ادائیگیوں کی صلاحیت کو بہتر بنانے اور ملکی معیشت میں اعتماد کے فروغ کے لیے اہم سمجھا جاتا ہے۔
کمرشل بینکوں کے ذخائر بھی بڑھے
اسٹیٹ بینک کی رپورٹ کے مطابق کمرشل بینکوں کے پاس موجود زرمبادلہ ذخائر میں بھی 1 کروڑ 94 لاکھ ڈالر کا اضافہ ریکارڈ کیا گیا،اس اضافے کے بعد کمرشل بینکوں کے مجموعی ذخائر 5 ارب 43 کروڑ ڈالر تک پہنچ گئے ہیں۔
مرکزی بینک کے مطابق اسٹیٹ بینک اور کمرشل بینکوں کے ذخائر کو ملا کر ملک کے مجموعی زرمبادلہ ذخائر 22 ارب 47 کروڑ ڈالر کی سطح پر پہنچ گئے ہیں، جو گزشتہ ہفتے کے مقابلے میں 3 کروڑ 25 لاکھ ڈالر زیادہ ہیں۔
معیشت کے لیے مثبت اشارہ
اقتصادی ماہرین کا کہنا ہے کہ زرمبادلہ ذخائر میں مسلسل اضافہ ملکی معیشت کے لیے مثبت پیش رفت ہے، مضبوط ذخائر نہ صرف درآمدی ادائیگیوں میں سہولت فراہم کرتے ہیں بلکہ بیرونی قرضوں کی ادائیگی، روپے کے استحکام اور سرمایہ کاروں کے اعتماد میں اضافے میں بھی اہم کردار ادا کرتے ہیں۔
حکومت اور اسٹیٹ بینک کی جانب سے بیرونی مالی وسائل میں اضافے، برآمدات کے فروغ اور ترسیلات زر میں بہتری کے لیے کیے جانے والے اقدامات کے باعث زرمبادلہ ذخائر میں استحکام برقرار رکھنے کی کوششیں جاری ہیں۔
By 
