مچل اسٹارک نے نئی تاریخ رقم کردی، دنیا کے کامیاب ترین لیفٹ آرم باؤلر بن گئے

آسٹریلیا کے فاسٹ باؤلر مچل اسٹارک نے بنگلادیش کے خلاف پہلے ٹیسٹ میں شادمان اسلام کو آؤٹ کرکے ایک نیا سنگ میل عبور کرلیا ، اس وکٹ کیساتھ ہی وہ ٹیسٹ کرکٹ کی تاریخ کے سب سے کامیاب لیفٹ آرم باؤلر بن گئے ہیں ۔

تفصیلات کے مطابق ڈارون میں کھیلے جارہے سیریز کے پہلے ٹیسٹ میں مچل اسٹارک نے اننگز کے 9ویں اوور میں شادمان اسلام کو نیتھن لیون کے ہاتھوں کیچ کرایا، اس وکٹ کے ساتھ ہی اسٹارک نے سری لنکا کے سابق اسپنر رنگانا ہیراتھ کی 433 ٹیسٹ وکٹوں کا ریکارڈ پیچھے چھوڑ دیا۔

آسٹریلوی کرکٹ اسٹار مچل اسٹارک کی ٹیسٹ وکٹوں کی تعداد اب 434 ہوگئی ہے، جو انہوں نے 106 ٹیسٹ میچز میں حاصل کی ہیں ، وہ ٹیسٹ کرکٹ میں سب سے زیادہ وکٹیں لینے والے باؤلرز کی فہرست میں بھارت کے لیجنڈری آل راؤنڈر کپل دیو کے ساتھ مشترکہ طور پر 11ویں نمبر پر پہنچ گئے ہیں۔

36 سالہ مچل اسٹارک کو ٹیسٹ کرکٹ میں ٹاپ 10 باؤلرز کی فہرست میں شامل ہونے کے لیے مزید صرف 6 وکٹیں درکار ہیں ، جنوبی افریقہ کے عظیم فاسٹ بولر ڈیل اسٹین 439 وکٹوں کے ساتھ اس فہرست میں دسویں نمبر پر موجود ہیں۔

Most Test wickets by a left-arm bowler

Mitchell Starc – 434 🔝
Rangana Herath – 433
Wasim Akram – 414 pic.twitter.com/pASuyB7rDL

— Cricinfo (@cricinfo) August 13, 2026

علاوہ ازیں پاکستان کے لیجنڈری فاسٹ باؤلر وسیم اکرم 414 ٹیسٹ وکٹوں کے ساتھ کامیاب ترین لیفٹ آرم باؤلرز کی فہرست میں تیسرے نمبر پر ہیں۔

یاد رہے کہ مچل اسٹارک نے اکتوبر 2010 میں آسٹریلیا کی جانب سے بین الاقوامی کرکٹ کا آغاز کیا اور جلد ہی تینوں فارمیٹس میں ٹیم کے اہم فاسٹ باؤلر بن گئے ، وہ ان چند کرکٹرز میں شامل ہیں جنہوں نے ون ڈے ورلڈ کپ، ٹی20 ورلڈ کپ اور ورلڈ ٹیسٹ چیمپئن شپ سمیت آئی سی سی کے تینوں بڑے مردوں کے عالمی ٹائٹل جیتنے کا اعزاز اپنے نام کیا ہے ۔

یہ بھی پڑھیں :آئی سی سی کی نئی ٹیسٹ رینکنگ جاری ، بابر اعظم کی ٹاپ 10 میں شاندار واپسی

ٹیسٹ میچز ہی نہیں بلکہ ون ڈے کرکٹ میں بھی اسٹارک اپنی قابلیت کی دھاک بٹھا چکے ہیں ، جہاں وہ 130 میچز میں 247 وکٹیں حاصل کرچکے ہیں۔ ان کی ون ڈے میں اوسط 23.58 ہے، جبکہ وہ آسٹریلیا کی 2015 اور 2023 کی ورلڈ کپ فاتح ٹیموں میں بھی شریک رہے ہیں ۔

مچل اسٹارک کی یہ شاندار کامیابی ان کی طویل اور شاندار ٹیسٹ کرکٹ کا ایک اور یادگار باب بن گئی ہے، جس نے انہیں لیفٹ آرم بولنگ کی تاریخ میں منفرد مقام دلا دیا۔