خاتون کی اے آئی تصاویر دیکھ کر نکاح، حقیقت سامنے آنے پر سابق ایم پی اے عدالت پہنچ گئے

سابق رکن سندھ اسمبلی غلام رسول انڑ نے اپنی سابق اہلیہ کے خلاف مبینہ دھوکا دہی، بلیک میلنگ اور سنگین دھمکیوں کے الزامات پر قانونی کارروائی کے لیے عدالت سے رجوع کرلیا۔

ایڈیشنل ڈسٹرکٹ اینڈ سیشن جج جنوبی کی عدالت میں دائر درخواست میں غلام رسول انڑ نے مؤقف اختیار کیا کہ ان کی ایک خاتون سے سوشل میڈیا کے ذریعے گفتگو شروع ہوئی جس کے بعد انہوں نے خاتون کو براہِ راست دیکھے بغیر 23 فروری 2026 کو ویڈیو کال کے ذریعے نکاح کرلیا۔

 یہ بھی پڑھیں :شادی کے ایک سال بعد عمیر جسوال نے اہلیہ کی تصویر مداحوں کیساتھ شیئر کردی

درخواست گزار کے وکیل عامر نواز وڑائچ نے عدالت کو بتایا کہ نکاح سے قبل جب غلام رسول انڑ خاتون سے چہرہ دکھانے کا مطالبہ کرتے تو انہیں مبینہ طور پر مصنوعی ذہانت سے تیار کردہ تصاویر بھیجی جاتیں۔ وکیل کے مطابق نکاح کے دوران بھی خاتون نے چہرہ ڈھانپ رکھا تھا۔

درخواست میں کہا گیا ہے کہ نکاح کے بعد جب سابق رکن اسمبلی نے خاتون کو دیکھا تو وہ پہلے دکھائی جانے والی تصاویر سے مختلف تھیں جس کے بعد انہوں نے خاتون سے علیحدگی اختیار کرلی۔

وکیل کے مطابق مبینہ طور پر دوری اختیار کرنے کے بعد خاتون نے سوشل میڈیا پر غلام رسول انڑ کی موت سے متعلق جعلی تصاویر اور پوسٹس شیئر کیں۔ درخواست گزار نے 9 اگست کو خاتون کو طلاق دے دی۔

 یہ بھی پڑھیں :شاہی شادی کا کیک یا عجائب گھر کا شاہکار؟ 500 کلو کی منفرد تخلیق

درخواست میں مزید الزام عائد کیا گیا ہے کہ طلاق کے بعد سابق اہلیہ کی جانب سے مبینہ طور پر کروڑوں روپے کا مطالبہ کیا جارہا ہے جبکہ انہیں بلیک میل کرنے اور جان سے مارنے کی دھمکیاں بھی دی جارہی ہیں۔

وکیل کے مطابق معاملے سے متعلق نیشنل سائبر کرائم انویسٹی گیشن ایجنسی (این سی سی آئی اے) میں بھی شکایت جمع کرائی جاچکی ہے۔

عدالت نے درخواست پر ایس پی کمپلین سیل، ایس ایچ او ڈیفنس اور سابق اہلیہ کو نوٹس جاری کرتے ہوئے پولیس سے 17 اگست تک رپورٹ طلب کرلی۔