اسپیکرقومی اسمبلی ایاز صادق اچانک چیئرمین پی ٹی آئی کی رہائش گاہ پہنچ گئے

اسپیکر قومی اسمبلی سردار ایاز صادق نے پاکستان تحریک انصاف (پی ٹی آئی) کے چیئرمین بیرسٹر گوہر علی خان کی رہائش گاہ پہنچ کر ان کی والدہ کے انتقال پر گہرے دکھ اور افسوس کا اظہار کیا اور مرحومہ کے ایصالِ ثواب کے لیے فاتحہ خوانی کی۔

اس موقع پر اسپیکر قومی اسمبلی نے بیرسٹر گوہر علی خان اور ان کے اہل خانہ سے دلی ہمدردی اور تعزیت کا اظہار کرتے ہوئے مرحومہ کے لیے دعائے مغفرت کی۔ انہوں نے اللہ تعالیٰ سے مرحومہ کے درجات کی بلندی اور سوگوار خاندان کے لیے صبرِ جمیل کی دعا کی۔

سردار ایاز صادق نے کہا کہ والدین کا بچھڑ جانا انسان کی زندگی کا ناقابلِ تلافی نقصان اور عظیم صدمہ ہوتا ہے، جبکہ ماں کا سایہ سر سے اٹھ جانا ایسا دکھ ہے جسے الفاظ میں بیان نہیں کیا جاسکتا۔

انہوں نے کہا کہ والدین کی محبت اور شفقت کا دنیا میں کوئی نعم البدل نہیں اور ان کی جدائی ہمیشہ ایک گہرا خلا چھوڑ جاتی ہے۔

یہ بھی پڑھین: وہ کونسا زہریلا مواد ہے جس نے ایک عام تحریک انصاف کے کارکن کو دہشتگرد بننے پر مجبور کیا؟ آزاد ڈیجیٹل حقائق سامنے لے آیا

اسپیکر قومی اسمبلی نے کہا کہ بیرسٹر گوہر علی خان اور ان کے اہل خانہ جس کرب اور غم سے گزر رہے ہیں، وہ اس مشکل گھڑی میں ان کے دکھ میں برابر کے شریک ہیں۔

انہوں نے مرحومہ کی مغفرت اور بلندیٔ درجات کے لیے دعا کرتے ہوئے بیرسٹر گوہر علی خان، ان کے اہل خانہ اور دیگر سوگواران کے لیے صبر و استقامت کی دعا بھی کی۔

اس موقع پر سردار ایاز صادق نے غمزدہ خاندان سے ہمدردی کا اظہار کرتے ہوئے کہا کہ ایسے مشکل وقت میں عزیز و اقارب اور دوستوں کا ساتھ غم بانٹنے اور متاثرہ خاندان کو حوصلہ دینے میں اہم کردار ادا کرتا ہے۔ انہوں نے بیرسٹر گوہر علی خان اور ان کے اہل خانہ کے لیے نیک خواہشات کا بھی اظہار کیا۔