مسلم لیگ (ن) کے صدر محمد نواز شریف موجودہ سیاسی صورتحال کے تناظر میں ایک بار پھر سیاسی اور عوامی سرگرمیوں میں متحرک دکھائی دے رہے ہیں۔ حالیہ دنوں میں ان کی سیاسی ملاقاتوں اور سرگرمیوں میں نمایاں اضافہ ہوا ہے جسے پارٹی حلقے مسلم لیگ (ن) کے اندر نئی سیاسی سرگرمی اور تنظیمی جوش کا باعث قرار دے رہے ہیں۔
نواز شریف نے لاہور کے مختلف علاقوں کا اچانک دورہ کیا اور ریلوے اسٹیشن انڈر پاس سرکلر روڈ سمیت مختلف مقامات پر جاری ترقیاتی کاموں کا جائزہ لیا۔ انہوں نے بازاروں کی تزئین و آرائش دکانوں پر آویزاں نئے بورڈز اور شہری سہولتوں سے متعلق اقدامات بھی دیکھے۔ حالیہ دنوں میں نواز شریف لاہور کے ترقیاتی منصوبوں کا مسلسل جائزہ لے رہے ہیں جبکہ اس سے قبل وہ بھاٹی چوک اور دیگر علاقوں میں بھی ترقیاتی کاموں کا معائنہ کرچکے ہیں۔
سیاسی حلقوں میں نواز شریف کی بڑھتی ہوئی سرگرمیوں کو موجودہ سیاسی حالات سے جوڑ کر دیکھا جا رہا ہے۔ گلگت بلتستان اور آزاد کشمیر کی سیاسی سرگرمیوں اور انتخابات کے بعد مسلم لیگ (ن) کے قائد کی مختلف سیاسی و اہم شخصیات سے ملاقاتوں کا سلسلہ بھی تیز ہوا ہے، جبکہ اب ان کی توجہ پارٹی سیاست کے ساتھ ساتھ پنجاب خصوصاً لاہور کے ترقیاتی معاملات پر بھی مرکوز نظر آرہی ہے۔
نواز شریف کی حالیہ سرگرمیوں میں ایک خاص بات یہ ہے کہ وہ صرف سیاسی ملاقاتوں تک محدود نہیں رہے بلکہ عملی طور پر مختلف علاقوں میں جاکر ترقیاتی منصوبوں اور شہری سہولتوں کا جائزہ لے رہے ہیں۔ لاہور کے تاریخی اور مرکزی علاقوں میں جاری منصوبوں کی نگرانی کے حوالے سے ان کی حالیہ آمد و رفت بھی اسی سلسلے کی کڑی قرار دی جارہی ہے۔
مسلم لیگ (ن) کے اندر نواز شریف کی اس فعال موجودگی کو مثبت انداز میں دیکھا جا رہا ہے۔ پارٹی ارکان اور کارکنوں میں یہ تاثر مضبوط ہورہا ہے کہ پارٹی قائد ایک بار پھر سیاسی میدان میں اپنی موجودگی نمایاں کررہے ہیں۔ سیاسی سرگرمیوں میں ان کی شرکت سے پارٹی کارکنوں کا اعتماد اور جوش بھی بڑھتا دکھائی دے رہا ہے۔
سیاسی مبصرین کے مطابق کسی بھی بڑی سیاسی جماعت کے لیے اس کے مرکزی قائد کی فعال موجودگی کارکنوں اور ووٹرز کے ساتھ رابطے میں اہم کردار ادا کرتی ہے۔ نواز شریف کی حالیہ سیاسی سرگرمیوں کے نتیجے میں مسلم لیگ (ن) کے اندر بھی یہ احساس بڑھ رہا ہے کہ پارٹی قیادت سیاسی میدان میں دوبارہ زیادہ فعال انداز میں موجود ہے۔
نواز شریف کی جانب سے ترقیاتی منصوبوں پر براہ راست توجہ دینے کا ایک پہلو یہ بھی ہے کہ مسلم لیگ (ن) کی سیاست میں ترقیاتی کارکردگی اور شہری منصوبوں کو ہمیشہ مرکزی اہمیت حاصل رہی ہے۔ لاہور میں جاری منصوبوں کا جائزہ لے کر نواز شریف بظاہر اسی سیاسی بیانیے کو مزید تقویت دیتے نظر آرہے ہیں۔
یوں ایک طرف نواز شریف کی سیاسی ملاقاتیں اور مشاورت بڑھ رہی ہے تو دوسری جانب وہ لاہور کے ترقیاتی منصوبوں کے معائنے کے ذریعے اپنی عوامی اور انتظامی دلچسپی بھی ظاہر کررہے ہیں۔ ان کی بڑھتی ہوئی سرگرمیوں سے مسلم لیگ (ن) کے حلقوں میں یہ تاثر نمایاں ہورہا ہے کہ پارٹی قائد آنے والے سیاسی مرحلے میں مزید فعال کردار ادا کرنے کی تیاری کررہے ہی
